Америкада қотиллик содир этилган, одам ўлиб узоқ вақт қолиб кетган жойларни тозаловчи фаррош штати бор… (юраги заифлар ўқимасин)

Хабарингиз борми, ё йўқми, Америкада шундай фирмалар борки, улар қотиллик содир этилган жойлар, ёки кимдир ўлиб қолиб мурдаси бир неча кун қолиб кетган масканларни тозалаш билан шуғулланади. Яқинда журналистлардан бири шундай фирмалардан бирининг ходими билан суҳбатлашди.

— Нега бу қадар жирканч ва қўрқинчли ишни танлагансан?

— Илгари ҳамма қатори офисда, компьютер қаршисида ўтириб ишлардим, — деди ўзини Майкл Ганс дея таништирган фаррош. — Жонга тегди. Қандайдир ноанъанавий, ҳеч кимникига ўхшамайдиган иш қидирдим. Охири шу фаррошлик маъқул келди.

— Қўрқмайсанми? Ҳар ҳолда кўпинча ўликларга дуч келасан.

— Қўрқсам, шу ишни танламасдим.

— Қандай жойларни ёқимсиз, ўта жирканч деб ҳисоблайсан?

— Агар бизни ишга чақиришса, демак, ўша ерда мурда бир неча кун қолиб кетган бўлади. Энг ёқимсиз жой деб ўшанақа масканларни ҳисоблайман. Ундай жойларни йиғиштириб тозалагунча одамнинг бўлари бўлади. Яна бир ёқимсиз ва жирканч жойда ишлашга тўғри келган. Кичик трейлер, яъни, автобусчанинг ичида ҳайдовчиси ўлиб бир неча кун қолиб кетган экан. У ерда сув ҳам, чироқ ҳам йўқ эди. Мурда ётган жойини пашша ва турли қумурсқа босиб кетибди. Жирканч бўлса ҳам айтаман, мурда деярли чириб битибди. Трейлернинг поли, деворларини тозалаб чиққунча ўзимиз ўлиб қолаёзганмиз.

Яна бир шунга ўхшаш ёқимсиз жойга борганмиз. Бир аёл икки ногирон болага қараркан. Ўғри-босқинчилар келиб аёлни ҳам, ногирон болаларни ҳам деворга қаратган ҳолда тик турғазган ва бошини мўлжаллаб отган. Ишонасизми, болалар ўйинчоқлари, девор, поллардаги қонларни артиб тозалаб чиққанмиз. Ўшанда икки кун кўнглим айниб ўзимга кела олмай юрганман.

— Шундай оғир ва ёқимсиз иш учун қанча ҳақ тўлашади?

— Бир соатга 25 доллар оламан. Йўл ҳақи бориш-келиш учун алоҳида тўлашади. Агар юқорида айтганим каби жирканч жойда ишласак, кўпроқ ҳақ талаб қиламиз. Ёқимсиз, гуноҳ бўлса ҳам айтаман. Мен бориб тозалайдиган жой қанча ёқимсиз, жирканч, сассиқ ва қўрқинчли бўлса, шунча кўп даромад қиламан.

— Ишда шерикларинг билан ҳазил-ҳузул ҳам қиласизларми?

— Албатта. Агар марҳумнинг яқинлари ёнимизда бўлмаса, ҳазил-ҳузул қиламиз. Бу нарса бизни руҳий эзилишдан, қўрқувдан асрайди. Куни билан қон, сассиқ ҳидлар ва қўрқинчли манзара ичида юргандан кейин ҳазил ва кулгига ўрин бермаса, фаррошга қийин бўлади.

Астағфирилло!!!