რუსულმა მედიამ აქტიურად გააშუქა "რუსთავი 2"-დან გიორგი გაბუნიას გაშვება
რუსული საინფორმაციო სააგენტოების, ინტერნეტ-გამოცემების და ტელეარხების მიერ გავრცელებული ცნობების უმრავლესობა იწყება იმით, რომ „რუსთავი 2“-იდან დაითხოვეს წამყვანი, რომელმაც 7 ივლისს, პირდაპირ ეთერში პუტინს აგინა, ან იმით, რომ გაბუნიამ უარი თქვა პუტინისთვის ბოდიში მოეხადა.
სამსახურიდან გიორგი გაბუნიას გათავისუფლებას თავის ოფიციალურ ვებსაიტზე გამოეხმაურა რუსეთის პირველი არხის წამყვანი ვლადიმირ პოზნერი, რომელიც გიორგი გაბუნიას მიერ გამოყენებულ ლექსიკას მიუღებელს უწოდებს, საქციელს კი, ამორალურს. „ამ ტელეწამყვანს ჩემთან რომ ემუშავა, იმ აღმაშფოთებელი სიტყვების გამო დაუყოვნებლივ დავითხოვდი და არა თითქმის ორი თვის შემდეგ“ - წერს პოზნერი.
ზოგიერთი რუსული მედიასაშუალება იმის გარკვევასაც ცდილობს შეუწყობს, თუ არა ხელს „რუსთავი 2“-დან გიორგი გაბუნიას გაშვება საქართველო-რუსეთის ურთიერთობების აღდგენას. რუსეთის სახელმწიფო ტელევიზიის ჟურნალისტი ანდრეი მედვედევი წერს, რომ ზოგიერთ კოლეგას გარკვეულ სიხარულს ამჩნევს გიორგი გაბუნიას გათავისუფლების გამო და ვარაუდებსაც ისმენს, რომ რუსეთ-საქართველოს ურთიერთობა დალაგდება, რაც მედვედევის თქმით, ძალიან უცნაურად ჟღერს.
რუსეთის დუმის საერთაშორისო საქმეთა კომიტეტის თავმჯდომარის პირველი მოადგილე დმიტრი ნოვიკოვი ახალი ამბების ფედერალურ სააგენტოს ეუბნება, რომ რუსეთში პოლიტიკური გადაწყვეტილებების მიმღებმა ბევრმა ადამიანმა ეს შესაძლოა, გარკვეულ პოზიტიურ სიგნალად აღიქვას, მაგრამ მოჰყვება, თუ არა ამას რეალიზაცია უცნობია. ნოვიკოვის განცხადებით, შეუძლებელია საქართველოს მმართველი ელიტის განწყობას პრორუსული უწოდო, თუმცა, საქართველოს წარმომადგენლები საღად აზროვნებენ საიმისოდ, რომ რუსეთთან კონფრონტაცია არ გამწვავდეს.