Վահե Գրիգորյանի հայտարարությունն ուղղված էր կոնկրետ քաղաքական ուժի նպատակների իրականացմանը. Ռուբեն Մելիքյան
«Դա մեկ իրավաբանի մեկնաբանությունն էր: Նախկինում այդ մեկ իրավաբանը, չունենալով պաշտոնական կարգավիճակ, մեծ հաշվով, ինչ ուզեր կարող էր մեկնաբանել: Ես կարծում եմ, որ վտանգավոր է, որ Սահմանադրական դատարանի դատավորի կարգավիճակ ունեցող, աջակիցների բավական մեծ շրջանակ ունեցող իրավաբանը այսպիսի յուրատիպ, մեր իրավաբանական ավանդույթին չհամապատասխանող մեկնաբանություններ է տալիս»: Այս մասին Tert.am-ի հետ զրույցում ասաց իրավապաշտպան, Արցախի հանրապետության Մարդու իրավունքների նախկին պաշտպան Ռուբեն Մելիքյանը` անդրադառնալով Սահմանադրական դատարանի դատավոր ընտրված Վահե Գրիգորյանի այն հայտարարությանը, որ ինքը ստանձնում է ՍԴ նախագահի պաշտոնը:
Ըստ Ռուբեն Մելիքյանի` այդ մեկնաբանությունը ոչ միայն չի համապատասխանում իրավաբանական ավանդույթին, այլ նաև կարող է իրավական անվտանգության լրջագույն խնդիրներ առաջացնել, որովհետև բացվում է հերթական պանդորայի արկղը: «Այնպես, ինչպես մենք ժամանակին բացեցինք ճանապարհներ փակելու պանդորայի արկղը և հիմա անընդհատ մարդիկ իրենց իրավունք են վերապահում ճանապարհներ փակել, ինչպես բացեցինք շենքերը արգելափակելու պանդորայի արկղը, սա էլ կարող է լինել հերթական պանդորայի արկղը, որը կբացվի, բայց ի տարբերություն մյուսների`այս պանդորայի արկղը բացելու հետևանքները կարող են անկանխատեսելի լինել և անհաշվարկելի վնաս հասցնել թե՛ պետականությանը, թե՛ իրավական մշակույթին»,-ասաց նա:
Ռուբեն Մելիքյանը նկատեց, որ առաջին դեպքը չէ, որ Վահե Գրիգորյանը իրավաբանական հանրության համար բավական տարօրինակ գաղափարներ է առաջ քաշում: «Ի դեպ, վերջերս նաև Ազգային ժողովում քննարկվում էր Վահե Գրիգորյանի մեկ այլ գաղափար, որը վերաբերում էր հանրապետության նախագահի ընտրության կարգին, որ ընտրությունը պետք է ժողովրդի կողմից լիներ: Նորից Սահմանադրության անցումային դրույթների յուրովի մեկնաբանության արդյունքն էր, և Վահե Գրիգորյանը ինքը ընդունեց, որ մեր իրավաբանական հանրությունը չի ընդունել այդ մեկնաբանությունը: Ես կարծում եմ, որ այս դեպքում ևս մեր իրավաբանական հանրությունը, կարելի է ասել, չընդունեց այս մոտեցումը»,-ասաց նա:
Իրավապաշտպանը նշեց, որ միայն որոշ իրավաբաններ էին փորձում Վահե Գրիգորյանի մոտեցումը պաշտպանել, և նրանք էլ, ըստ էության, բոլորը ուղիղ կամ անուղղակի կապված են իշխող քաղաքական ուժի հետ: «Չեզոք իրավաբանները կա՛մ կարիք անգամ չէին տեսնում այս գաղափարի մեկնաբանության՝ այն համարելով աբսուրդային և քննարկման ոչ ենթակա, կա՛մ փորձում էին, այնուհանդերձ, որոշակի փաստարկներ բերել, որոնց կարիքը, դժվար է ասել, կա՞, թե՞ չկա: Վահե Գրիգորյանի այս մոտեցումը բազմաթիվ ուղղություններով կարելի է մերժելի համարել»,-ասաց նա:
Ըստ Ռուբեն Մելիքյանի` եթե Վահե Գրիգորյանի տրված մեկնաբանությունը գոյության իրավունք ունենար, ապա Սահմանադրության ընդունումից մինչև երեկ որևէ իրավաբան նման միտք հայտնած կլիներ:
«Մեր իրավաբանությունը ունի որոշակի կարմիր գծեր, այդ կարմիր գծերը չգրված են, իհարկե, բայց որոշ դեպքերում զգում ես, որ կարմիր գիծը հատված է: Ես կարծում եմ, որ երեկ մեր իրավաբանական հանրությունը նման զգացողություն ուներ: Դա, անկասկած, քաղաքական բովանդակություն ուներ, ուղղված էր կոնկրետ քաղաքական ուժի քաղաքական նպատակների իրականացմանը` կապված Սահմանադրական դատարանը և ամբողջ դատական համակարգը վերահսկողության տակ վերցնելու հետ: Իմ համոզմամբ, դա ուղղակի պատճառական կապի մեջ էր մայիսի 19-ին սկսված հակասահմանադրական գործընթացի հետ, որի գործողություններից առաջինը դատարանների մուտքերի արգելափակումն էր և այդ դրսևորումներից մեկն էլ երեկվա փորձն էր` Սահմանադրական դատարանի նորընտիր դատավորի կողմից: Ես համաձայն եմ իմ գործընկերների այն դիտարկմանը, որ եթե այս հայտարարությանը հաջորդեր որոշակի գործողություններ, ապա այդտեղ նույնիսկ հանցակազմի մասին հնարավոր կլիներ խոսել»,-ասաց նա: