მოსკოვი გამოძიებაში რუსეთის ჩართვას მოითხოვს
„ჩვენ, რა თქმა უნდა, ასევე უნდა მივიღოთ მონაწილეობა ამ ინციდენტების გამოძიებაში. არ ვერევით საქართველოს საშინაო საქმეებში, მაგრამ აგრესიული და მტრული ქმედებები რუსეთის ფედერაციის მიმართ, რასაკვირველია, უნდა იქნას გამოძიებული“, - განაცხადა გავრილოვმა.
მისივე შენიშვნით, რუსეთის სახელმწიფო სათათბიროში იმედოვნებენ, რომ საქართველოს ხელისუფლება გამოავლენს და დასჯის იმ პირებს, რომლებიც პასუხისმგებლები არიან თბილისში მოწობილ არეულობაზე, თუმცა, როგორც გავრილოვი ამბობს, რუსეთის ფედერაცია, თავის მხრივ, ასევე მზადაა მონაწილეობა მიიღოს ამ ძალადობრივი ღონისძიების მომწყობთა დასადგენად.
რუსი დეპუტატი თბილისში, 20 ივნისს მომხდარ ინციდენტზე გამოცემა „კომერსანტსაც“ ესაუბრა.
„იძულებული გავხვდით დაგვეტოვებინა პარლამენტი, გადავინაცვლეთ სასტუმროში, სადაც დავასრულეთ სხდომა. განვიხილეთ ჩვენს მიერ დღის წესრიგში შეტანილი ყველა საკითხი, რომელსაც მხარი დაუჭირა ყველა დელეგაციამ, ყველა 25-ივე მეთვალყურემ. ასამბლეამ მიიღო კოლექტიური განცხადება, რომ სესიას ვასრულებთ იმის გამო, რომ არ გვაქვს არც ნაყოფიერი მუშაობის პირობები და არც მონაწილეთა უსაფრთხოების გარანტიები. მივიღეთ ბოდიში, რომელიც საქართველოს პარლამენტის რამდენიმე დეპუტატმა მოგვიხადა. ...როცა უკვე სასტუმროში ვიყავით და გამოვედით პრესასთან, თავს მაშინ დაგვესხნენ. სამწუხაროდ, უსარფთხოების სამსახურმა ვერ მოახერხა თავდასხმის თავიდან აცილება. აუცილებლად მიმაჩნია, რომ ქართველმა სამართალდამცავებმა უნდა განსაზღვრონ ამ ექსტრემისტების პასუხისმგებლობა. მათ შორის, სავარაუდოდ, საქართველოს პარლამენტის იმ წევრებისა, რომლებიც ფიზიკური ანგარიშსწორებით იმუქრებოდნენ. პარლამენტის ტრიბუნიდან აცხადებდნენ, რომ გვხოცავდნენ და მომავალშიც დაგვხოცავდნენ“, - უთხრა სერგეი გავრილოვმა „კომერსანტს“