Сентябрьдә булачак сайлауларга әзерлек башланды
Быел сентябрьдә булачак сайлауларга әзерлек башланды. Үткән атнада авыл җирлекләрендә “Бердәм Россия” партиясеннән җирле советларга депутатлыкка кандидатлыкка кандидатлар арасында беренче праймериз үткәрелде. 13 майда шундый беренчел сайлау Кошки һәм Иске Матак авыл җирлекләрендә узды. Аларда Татарстан Дәүләт Советының социаль сәясәт комиссиясе рәисе урынбасары Татьяна Воропаева да катнашты.
Праймериз (беренчел, ягъни алдан сайлау) – сәяси партиядән бердәм кандидат сайлана торган тавыш бирү. Шулай сайлап алынган кандидатлар аннары гадәти тавыш бирүдә катнаша. Праймеризның мәгънәсе шунда – бер партиядән кандидатлар төп сайлауда бер-берсеннән тавышларны “алмасын”. Чөнки бит аларның электораты гадәттә бер үк.
Мәгълүм булганча, 13 сентябрьдә Татарстан Президентын сайлау һәм муниципаль сайлаулар узачак. “Бердәм Россия” җирле органнарга депутатлыкка кандидатларны праймериз үткәреп, ягъни партия эчендә алдан тавыш бирү юлы белән сайлап алырга булды.
Кошки авыл җирлегендә “Бердәм Россия”дән җирле советларга депутатлыкка кандидат булып барасы 7 кешене 14 кандидатура арасыннан сайлап алу оештырылды. Кандидатлар өчен тавыш бирергә “сайлаучылар” төркеме төзелгән. Аның составында “Бердәм Россия” партиясе әгъзалары да, “Татарстан-Яңа гасыр” иҗтимагый хәрәкәте һәм башка җәмәгать оешмалары вәкилләре дә бар.
Праймериз Татар Төгәлбәе клубында узды. Биредә әлеге чараны үткәрү өчен барлык шартлар тудырылган.
Иң элек “Бердәм Россия” Бөтенроссия партиясенең район җирле бүлеге башкарма комитеты җитәкчесе Айсылу Садретдинова праймеризны үткәрү тәртибе белән таныштырды.
Муниципаль район башкарма комитеты җитәкчесе Мария Платонова соңгы елларда Татарстаныбызның төрле тармакларда ирешкән уңышлары, Президент Рөстәм Миңнеханов стратегиясенең республика үсеше һәм алгарышында хәлиткеч роле хакында чыгыш ясады.
–Безнең район республикада кабул ителгән барлык программаларда да катнаша. Юллар, күперләр төзүгә бик күп средстволар тотыла. Социаль объектлар салына, булганнарына капиталь ремонт үткәрелә,–дип билгеләп үтте Мария Андреевна.
Праймеризда катнашасы 14кандидатлыкка кандидатка алдан билгеләнгән тавыш бирүчеләр (выборщики) алдында үзләренең сайлау алды программасы белән чыгыш ясау мөмкинлеге бирелде. Бу мөмкинлектән кандидатларның бишесе генә файдаланды.
Беренче итеп район урман хуҗалыгы җитәкчесе Евгений Васяйчевка сүз бирелде. Ул алдагы чакырылышта да бу авыл җирлеге советына депутат булып сайланган. Аның тырышлыгы һәм катнашы белән бу якларның үзәнлекләрен яшелләндерү буенча шактый эшләр башкарылган. Алга таба да агачлар утырту эшен дәвам итәрбез, авылларны тагын да ямьләндерербез, дип ышандырды Евгений Васяйчев.
Кандидатураларның икенче Эльфира Нуртдинова үз чыгышында Кошки авыл җирлеге башлыгы буларак башкарган эшләренә хисап тотты. Әйтергә кирәк, алдагы сайлаулардан соңгы елларда җирлектә бик күп эшләнгән. Язгы-көзге пычракларда тракторда гына барырга мөмкин булган Кошки ягына бүген теләсә нинди һава торышында асфальт юлдан җиңел автомобильдә элдертеп кенә киләсең. Алай гына да түгел, Татар Төгәлбәенең дә, Кошкиның да буеннан-буена асфальт салынган. Авыл җирлеге территориясендә күпер төзелгән, зират тирәләре тотылган, урамнарга яктырткычлар эленгән, халыкны су белән өзлексез тәэмин итү юнәлешендә күп эш башкарылган. Эльфира Нуртдинова депутат булып сайланган очракта нинди эшләр планлаштыруы хакында да бәян итте.
Кошки мәктәбе укытучысы Ирина Исаева:
–Яңа уку елыннан мәктәбебез ябыла, күпме укытучы эшсез кала,–дип борчылып чыгыш ясады.
Праймериз барышында Татьяна Воропаева да сүз алды. Ул мәктәп ябылу турындагы борчулы чыгышны игътибарсыз калдырмады:
–Укучылары аз, белем бирү шартлары түбән булган мәктәпләр озак яши алмый шул. Андый кечкенә мәктәпләрдә белем бирү тиешле дәрәҗәдә түгел. Хезмәткәрләренә эш урыннары кирәк дип кенә мондый уку йортларын саклап калып булмый. Ә башлангыч мәктәпләр авылда бер генә укучы бала булганда да эшләячәк,–диде.
Татьяна Васильевна праймериз үткәрү буенча да үз фикерен җиткерде.
–Элек бит авыл җирлеге башлыгы кемнән нинди ярдәм бар – шуннан чыгып аны депутат итеп сайлатырга тырыша иде,–диде ул. –Андый алым да ярагандыр бәлки. Бүген инде праймериз үткәреп без депутатлар корпусына халык сайлавына аеруча эшлекле, алга карап фикер йөртә белүчеләрне тәкъдим итәбез. Алдагы сайлауда үткәрелгән праймериз бу алымның бик күп уңай якларын күрсәтте.
Татар Төгәлбәендә праймериз барлык таләпләргә җавап бирерлек итеп үткәрелде. Бу турыда санау комиссиясе рәисе Рузалия Сафина хисап тотты.
Нәкъ шундый праймериз Иске Матак авылында да булды. Иске Матак авыл җирлегендә ун округ буенча депутатлар сайланачак. Праймеризда депутатлыкка кандидатлыкка егерме кандидатура катнашты. Аларның берничәсе тавыш бирүчеләр алдында чыгыш ясады.
Башта Ольга Гуляева сүз алды. Ул Чуаш Шәпкәсе балалар бакчасы мөдире. Ольга Григорьевна заманында терлекчелек фермасы мөдире булып та эшләгән. Бик тырыш, җаваплы ханым ул. Әле дә кечкенә генә коллективлары белән күп итеп яшелчә, җиләк-җимеш үстереп, балаларны витаминлы азыклар белән сыйлыйлар икән.
Аннан соң озак еллар биредәге совхоз кырларында икмәк үстергән, хәзер “Кызыл Шәрык-Агро” отрядында баш агроном Николай Кудряшов чыгыш ясады.
–Гомерем буе авыл җирендә хезмәт куйдым. Депутат булып сайлана калсам, көчемне, энергиямне кызганмый төп эшемне дә, алдыма куелган өстәмә бурычларны да башкарырга тырышырмын,–диде ул.
33 ел дәвамында физика укыткан, соңгы 13 елда Иске Матак мәктәбе директоры булып эшләүче Мария Чванованың чыгышы да эшлекле фикерләргә бай булды.
Аннан тавыш бирүчеләр янәшә бүлмәдә 20 кандидатлыкка кандидат теркәлгән бюллетеньнәрне алып, алар арасыннан үзләре иң лаеклы дип тапканнарны сайладылар.
Бу көннәрдә башка авыл җирлекләрендә дә праймериз дәвам итә.