"ნაციონალური მოძრაობა" შუალედურ არჩევნებზე მხარს შალვა შავგულიძეს დაუჭერს

ფრაქცია " ნაციონალური მოძრაობის" თავმჯდომარის, რომან გოცირიძის თქმით, ის მიესალმება ყველა ოპოზიციურ გაერთიანებას. მისივე თქმით, "ნაციონალურ მოძრაობას", სავარაუდოდ, არ ეყოლება კანდიდატი იმ ოლქებში, სადაც ოპოზიცია კონკურენტუნარიან კანდიდატს წარადგენს.


"ჩვენ მივესალმებით ყველა გაერთიანებას. საპრეზიდენტო არჩევნებში დავინახეთ, რომ გაერთიანებას აქვს შედეგი და ეს შედეგი იყო ოპოზიციური ძალების კანდიდატის გამარჯვება. კარგია, რომ მათ ერთიანი კანდიდატი წარადგინეს. რამდენიმე ოლქში მიმდინარეობს არჩევნები და ჩვენ ალბათ, არ დავაყენებთ იქ, სადაც კონკურენტუნარიანი კანდიდატი ეყოლება ოპოზიციას. ჩვენ განვიხილავთ სხვადასხვა ვარიანტს , ისევე, როგორც ისინი ფიქრობენ ზუგდიდში ჩვენ კანდიდატს დაუჭირონ მხარი," - განაცხადა რომან გოცირიძემ.


"ევროპულმა საქართველომ" და "თავისუფალმა დემოკრატებმა" კოალიცია შექმნეს და მთაწმინდაზე შუალედურ არჩევნებზე შალვა შავგულიძის კანდიდატურა წარადგინეს.


შუალედური არჩევნები მთაწმინდის ოლქში 19 მაისს ჩატარდება.