Rostovta “Hizb ut-Tahrir davası”nıñ ekinci Bağçasaray taqımınıñ mabüsleri soñki söznen mahkemede çıqışta bulundı
Sönki sözde dava iştirakçilerinden iç birisi öz qabaatını tanımadı ve cinaiy davanıñ “siyasiy sebepli hususiyet” bar olğanını qayd etti.
“Bugünde bugün qırımtatarlarğa qarsı yapılğan areketlerniñ siyasiy sebepli hususiyeti bar. Ve mahkeme sisteması basqınçnıñ siyasiy aleti kibi qullanıla”, - dedi mahkemede Remzi Memetov.
Bundan ğayrı, soñki sözünde Memetov, şimdiki “qırımtatarlarnıñ taqibini” 1944 senesiniñ vaqialarınen qıyasladı.
“Tarih halqımnıñ qanunsız taqibini ve adaletsiz qabaatlavınıñ misallerini endi bile, olarnıñ neticesinde 1944 onı sürgün etmek qararı alınğan edi. Sürgünlik neticesinde halqım, qırımtatarlar tuvğan Vatanından sürgün etildi ve sovet birliginiñ başqa bölgelerine avuştırıldı. Halqnıñ 46%-ından çoq elâk oldı,bütün millet çaypaldı, mülkü çaypaldı, Vatanına sevgisi çaypaldı”, - dep qoştı Memetov.
2014 senesinden soñ “qırımtatarlarnıñ kütleviy taqibini” soñki sözünde başqa qabaatlanğan kişi, Ruslan Abiltarov da qayd etti.
“1993 senesinden 2014 senesinece Qırımda yaşağance, anda ne yasaqlanğan teşkilâtlar bar edi, ne de tintüvler. Amma ondan soñ qırımtatarlarnıñ tintüvleri başlandı, olarnı nasıldır yasaqlanğan faaliyetlerde qabaatlap başladılar. Mahkeme davaları uydurılğan, şaatlar yalancasına gizlengen, ekspertizalar sımarlanğan ve yalanda qurulğan. Men Ukraina vatandaşı ve Qırımda yaşağanda, Qırım Ukraina terkibine kirgen vaqıtta, men tintüvler aqqında, hususan qırımtatarlarda bilmedim, eşitmedim”, - dedi Abiltarov.
Aynı vaqıtta, advokat Emil Kurbedinov Qırım.Aqiqatqa tefsir bergende, aqlayıcı ükümge ümüt etkenini bildirdi.
2016 senesi mayıs 12-de Bağçasarayda Rusiye telükesizlik hadimleri musulmanlar, qırımtatarlarnıñ evleri ve yerli qavehanede bir sıra tintüvler keçirdi. Neticede dört Bağçasaray sakini: Zevri Abseitov, Remzi Memetov, Rustem Abiltarov ve Enver Mamutov yaqalanıp, terrorizmde qabaatlandı. Olarnı, Rusiyede terroristik tanılğan «Hizb ut-Tahrir» teşkilâtında iştirak etkenlerinden şübheli sayalar.
2017 senesiniñ oktâbr ayında Rusiye telükesizlik hadimleri Bağçasaraynıñ altı sakinini tutıp alğan edi. Bular – Timur İbragimov, Marlen Asanov, Memet Belâlov, Seyran Saliyev, Server Zakiryayev ve Ernes Ametov. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletlerini bir İslam hilâfeti içinde birleştirüvde köreler. Lâkin olar buña irişmek içün terroristik usullarnıñ qullanılmasını red ete ve Rusiyede aqsız yerde taqip etilgenlerini aytalar. 2003 senesinde Rusiyeniñ Yuqarı mahkemesi «Hizb ut-Tahrir»ni yasaq etip, «terroristik» olaraq tanılğan 15 birleşmeniñ cedveline kirsetti.