Միահեծան իշխանություն չպիտի լինի. ձգտում ենք, որ հանրային քաղաքականության երկրորդ բևեռ ստեղծվի, և այդ նպատակով մասնակցում ենք ընտրություններին. Գ. Չուգասզյան (տեսանյութ)
Գիտակցելով, որ ՀՀ-ում միահեծան իշխանություն չպիտի լինի, ձգտում ենք, որ Հայաստանում որակապես հանրային քաղաքականության երկրորդ բևեռ ստեղծվի և հենց այդ նպատակով մասնակցում ենք ընտրություններին:
Այս մասին Tert.am-ի հետ զրույցում ասաց «Սասնա Ծռեր» համահայկական կուսակցության համահիմնադիր, կուսակցության համամասնական ցուցակի 3-րդ համար Գարեգին Չուգասզյանը:
«Կարելի է ասել՝ իշխող կուսակցությունն իր քարոզարշավը ապրիլ, մայիս ամիսներին ավարտել է, որովհետև այն ըմբոստությունը, որն իրենք ղեկավարեցին, և իշխանափոխությունը տեղի ունեցավ Հայաստանում, նախ իրենց շնորհիվ էր, և բնականաբար իրենց հավակնությունը՝ ձայների մեծամասնություն ստանալու, լրիվ հասկանալի է»,- նշեց նա:
Գարեգին Չուգասզյանն ասաց, որ սպասում էին, որ ԸՕ-ն պետք է փոխվեր, քանի որ ԸՕ-ն թույլ չի տալիս, որ հավասար պայմաններ ստեղծվեն, առհասարակ կարծում էին, որ այս ընտրություններն ավելի ուշ կլինեին, բայց վճռականությամբ մասնակցում են ընտրություններին՝ ապացուցելու համար, որ ունեն այն ընտրազանգվածը, որն իրենց հետևից կգա և հնարավորություն կտա անցնել խորհրդարան: Գարեգին Չուգասզյանն ասաց, որ մարզերում ունեն մոտ 40 շտաբներ , նախատեսում են դրանց թիվը հասցնել 50-ի: Գարեգին Չուգասզյանն ասաց, որ պատրաստ են համագործակցել նոր ձևավորված կուսակցությունների հետ, դրանց ներկայացուցիչների, օրինակ՝ Լևոն Շիրինյանի:
«Ինչ վերաբերում է ընտրություններին մասնակցող մյուս ուժերին, նրանց կուսակցություններ չէի կոչի, որովհետև տարիներ շարունակ հանցավոր համագործակցությամբ երկիրը ղեկավարել են ՀՀԿ-ականները, որոնք կուսակցություն չեն, ուղղակի ալան-թալանի շուրջ պայմանավորված մի հանցախումբ են: Շատ մեծ քանակով պարագլուխներ են եղել, որոնք պետք է պատժվեն, պատասխանատվություն կրեն, ոչ թե մասնակցեն ընտրություններին: Մեր գնահատականով՝ սա կլինի անցումային խորհրդարան, մինչև որ իսկապես կձևավորվի քաղաքական դաշտը, որն անապատացրել են այդ ուժերը՝ հին ռեժիմի մնացուկները»,- շեշտեց նա:
Անդրադառնալով հարցին, թե կաշկանդվածություն ունեն, պարտավորված են ԲՀԿ-ին չքննադատել, քանի որ նրանք «Սասնա Ծռերի» որոշ անդամների ազատության համար գրավ էին վճարել, իսկ այսօր ԲՀԿ-ն ձգտում է ընտրություններից հետո մնալ 2-րդ ուժը, Գարեգին Չուգասզյանն ասաց.
«Քանի որ եղել է համաժողովրդական հանգանակություն, մոտ 60 մլն դրամ է հավաքվել, էդ 60 մլն-ի մեջ եղել է 2 մլն–ի մասնակցություն ԲՀԿ-ականների կողմից, եթե դա պարտավորություն ստեղծեր, ուրեմն կլիներ շատ անարդար պարտավորություն, մենք երբեք այդպիսի պայմանավորվածություն չենք ունեցել, ավելին ասեմ՝ համաներում իրականացնելուց հետո հնարավոր է՝ այդ գումարները վերադարձվեն: Մենք առևտուր չենք արել, եղել է կամավոր մասնակցություն բոլորի կողմից»,- նշեց նա:
Գարեգին Չուգասզյանն ընդգծեց, որ հիմա էլ ասում են, որ ՀՀԿ-ն, ԲՀԿ-ն, ՕԵԿ-ը, ՀՅԴ-ն «Մարտի մեկի» «կոալիցիայի» խումբն են, և ժողովուրդը պետք է հասկանա, որ այս ուժերը մեզ հետ են տանում դեպի հին ռեժիմի ռեստավրացիայի: Նա շեշտեց, որ պատասխանատվության չափաբաժինները տարբեր են եղել, ԲՀԿ-ն սպասարկողի դերում է եղել:
Անդրադառնալով հարցին, թե «Սասնա Ծռերի» վարկանիշը չի տուժում, կուսակցությունը չի սասանվում, որ իրենց ցուցակում չկա Պավել Մանուկյանը, ով հենց Չուգասզյանին դասալիք էր անվանել, ասելով, թե նա իրավունք չունի «Սասնա Ծռերի» անունից խոսել, Գարեգին Չուգասզյանն ասաց.
«Չմասնակցելն իր իրավունքն է, ամեն մարդ ինքն է որոշում, կուսակցությունը ստեղծվել է, իր հայտարարությունները ես չէ, որ պետք է մեկնաբանեմ, ինչ որ ասել է, պատասխան ստացել է իր հրամանատարներից իր հայտարարությունների անհեթեթ լինելու վերաբերյալ, ես չունեմ այստեղ ասելիք: Սասանվել բառը ճիշտ կլիներ, եթե մի հերոսի իր հրամանատարին չենթարկվելուց ամբողջ գունդը սասանվեր, բայց գունդը չի սասանվում, երբ որ մարտիկներից մեկը չի ենթարկվում իր հրամանատարին»,- նշեց նա:
Անդրադառնալով իրենց հասցեին հնչող քննադատություններին, թե մի օր էլ «Ծռերը» կրակելու են Նիկոլ Փաշինյանի ուղղությամբ, Գարեգին Չուգասզյանն ասաց, որ բռնակալություն չկա, որ դրա դեմ ինքնապաշտպանության անհրաժեշտություն առաջանա: