МТС “ўзбек иши” ортидан рекорд даражада моддий зарар кўрди

Россиянинг МТС телекоммуникация компанияси 2018 йилнинг учинчи чораги якуни бўйича 37 млрд рубь ($562 млн) моддий зарар кўргани ҳақида ҳисобот берди. Бу ҳақда Forbes.ru хабар берди. Моддий зарар компаниянинг тушуми миқдорининг (128,5 млрд рубль ёки $1,95 млрд, бу кўрсаткич ўтган йилнинг шу даврига нисбатан 11,7% ўсган) учдан бир қисмини ташкил этади. Компаниянинг молиявий натижаларига АҚШ Адлия вазирлиги томонидан компаниянинг Ўзбекистонда олиб борган бизнеси билан боғлиқ аксилкоррупциявий текширувнинг эҳтимолий оқибатларини тартибга солиш учун ажратилган 55,8 млрд рубь ($848 млн) миқдоридаги резерв таъсир этган. МТС, (ҳозир — VEON) ва TeliaSonera телекоммуникация компанияларига нисбатан текширувлар АҚШ Қимматбаҳо қоғозлар ва биржалар бўйича комиссияси (SEC), АҚШ Адлия вазирлиги ва Нидерландия прокуратураси томонидан 2014 йилда бошланган. Компаниялар гўё Ўзбекистонда бизнес юритиш имконияти ҳамда лицензия ва частоталар учун Ўзбекистоннинг ўша пайтдаги президентининг тўнғич қизи Гулнора Каримовага яқин бўлган олий мартабали мулозимларга пора бериб келишган. Барча шубҳали битим ва келишувлар 2006 йилнинг сентябридан 2011 йил октябргача амалга оширилган. VimpelCom 2016 йил февралда АҚШ ва Нидерландия расмийлари билан ишни тартибга солиш тўғрисида келишиб олди ҳамда $795 млн жарима тўлашга тўғри келди. Telia компанияси $965 млн тўлади. МТС Ўзбекистон бозорига 2004 йилда “Ўздунробита” алоқа компаниясини сотиб олганидан сўнг кириб келган. Ўзбекистон расмийлари 2012 йилда 250 та таянч базаларидан ноқонуний эксплуатациясида, маблағлардан мақсадга хилоф тарзда фойдаланишда, маблағларни нақдлаштириш бўйича ноқонуний схемалардан фойдаланиш ва солиқ тўлашдан бўйин товлашда, шунингдек, вилоятлардаги филиалларнинг лицензиясиз фаолият юритишда айблангандилар. Ўзбекистон Бош прокуратураси, аксилмонополия органлари, Ўзбекистон Алоқа ва ахборотлаштириш агентлиги, солиқ органларининг “Ўздунробита” МЧЖга даъвоси 1 млрд доллардан ошиб кетди. Бу миқдор МТС компаниясининг Ўзбекистондаги бизнесни ривожлантиришга киритган инвестицияларига тенг бўлиб чиқди. Кейинроқ компания билан давлат ўзаро тил топишиб олди ва оператор 2016 йилга қадар Ўзбекистон бозорида ишлади. “Фарғона” халқаро ахборот агентлиги