АЙГА КЫРЫН КАРАМА
28 март (шимбә). Җөмәдел ахир аеның 8 нче көне. 9 нчы Ай тәүлеге. Ай Кысла йолдызлыгында, 10.55 сәгатьтә калка, 2.12 сәгатьтә бата. 2 нче фаза. Көн озынлыгы 12.46 сәгать.
Авыр энергетикалы көн. Бөтен артык нәрсәдән котылу, аралашуны чикләү, уйлар өермәсен контрольдә тоту, үзегезне үпкәләтүчеләрне кичерү ягын карагыз. Өй эшләре белән генә шөгыльләнү, гаиләгә игътибарлы булу отышлы. Күкрәк, ашказаны зәгыйфь. 28, 29 мартта берьеллык чәчәкләр, карбыз, кавын, кабак, кәбестә, татлы борыч, помидор, кыяр, баклажан, ташкабак, борчак, фасоль, укроп, рәйхан, әнеч чәчү уңай нәтиҗә бирә.
Хәтер начарланса (1)
Хәтер начарлану сәбәпләре – стресс, ашыгу-кабалану, үз өстеңә артык күп эш йөкләү. Әмма хәтернең иң явыз дошманы – телевизор, ул баш миен зәгыйфьләндерә. Хәтерне яхшырту өчен түбәндәгеләрне эшләү файдалы: 1) пианинода уйнаган кебек, бармаклар белән өстәлгә суккалау. Бу гади күнегүләрне көн саен 10 минут кабатлау фикерләү эшчәнлеген яхшырта. 2) Бер үк вакытта берничә эш эшләргә (мәсәлән, телефоннан сөйләшкәндә телевизор карарга) ярамый, игътибарны бер генә нәрсәгә туплагыз. 3) Атнасына 2 генә сәгать булса да китап укып, эчтәлеген сөйләп карарга кирәк.
29 март (якшәмбе). Җөмәдел ахир аеның 9 нчы көне. 10 нчы Ай тәүлеге. Ай Арыслан йолдызлыгында, 11.56 сәгатьтә калка, 2.49 сәгатьтә бата. 2 нче фаза. Көн озынлыгы 12.51 сәгать.
Нәсел, гаилә, гореф-гадәтләр белән бәйле көн. Ял итү, үткәннәр турында уйлану, гаиләне ныгыту өчен иң яхшы вакыт. Сизгерлек күрсәтергә, башкаларга файда китерергә кирәк. Күкрәк читлеге, бөтен сөякләр системасы зәгыйфь. Ач тору, организмны чистарту уңай нәтиҗә бирә.
Хәтер начарланса (2)
4) Көн саен кибеткә җыенганда исемлек язарга, тик аңа карамаска кирәк. Кайткач, исемлекне тикшерәләр. Сатып алган әйберләр бәясен калькуляторсыз исәпләү дә файдалы. 5) Телефоннан сөйләшкәннән соң, ишеткән яңалыкларны тагын бер кат күңелдән кичерү зарур. 6) Төштән соң иртән нәрсә эшләгәнне искә төшерергә, үткән атнаның шул көнендә нишләгәнне хәтерләргә тырышырга кирәк. 7)Шигырьме ул, телефон номерларымы – нәрсә булса да ятлау файдалы, иң шәп вариант исә – чит тел өйрәнү.
30 март (дүшәмбе). Җөмәдел ахир аеның 10 нчы көне. 11 нче Ай тәүлеге. Ай Арыслан йолдызлыгында, 13.00 сәгатьтә калка, 3.18 сәгатьтә бата. 2 нче фаза. Көн озынлыгы 12.56 сәгать.
Үзгәрү, сафлык, катгыйлык көне. Һәрбер эшне үтәгәндә сак һәм игътибарлы булу, башлаган эшне ахырына җиткерү сорала. Умырткалык зәгыйфь. Бүген йокысызлык интектерергә мөмкин, мелисса һәм эвкалипт исе йоклап китәргә булыша. Арыслан билгесенең хакиме – Кояш, шунлыктан кояшлы көндә урамда җәяү йөрү бик файдалы.
31 март (сишәмбе). Җөмәдел ахир аеның 11 нче көне. 12 нче Ай тәүлеге. Ай Кыз йолдызлыгында, 14.05 сәгатьтә калка, 3.44 сәгатьтә бата. 2 нче фаза. Көн озынлыгы 13.00 сәгать.
Мәхәббәт, мәрхәмәт, сабырлык энергиясенә бай көн. Сәламәтлек яхшы, әмма йөрәк авыртырга, кан басымы күтәрелергә мөмкин. Балалар тәрбияләү, аларга үгет-нәсихәт бирү өчен уңай вакыт. Бүген бүлмә гөлләре утырту һәм күчереп утырту, чәчәкләр чәчү әйбәт нәтиҗә бирә.
Баш авыртканда
5 аш кашыгы һинд чәе, 2шәр аш кашыгы сары мәтрүшкә һәм бөтнек, 1әр аш кашыгы чабыр үләне һәм валериана тамырын кушып, 1 аш кашыгы җыелманы 1 стакан кайнар суда суынганчы төнәтәләр дә, сөзәләр, һәр 2 сәгать саен әз-әзләп эчеп куялар. Ә менә аппетитны яхшырту, эч күпкәнне бетерү, суалчаннарны куу өчен, 1 чәй кашыгы гөлбадран чәчәген 1,5 стакан кайнар суда пешерәләр дә, 3-4 көн рәттән иртән һәм йоклар алдыннан ач карынга эчәләр, әчкелтем булса, бераз бал кабалар.
1 апрель (чәршәмбе). Җөмәдел ахир аеның 12 нче көне. 13 нче Ай тәүлеге. Ай Кыз йолдызлыгында, 15.10 сәгатьтә калка, 4.07 сәгатьтә бата. 2 нче фаза. Көн озынлыгы 13.05 сәгать.
Үзгәрешләр көне. Аралашу, белем алу файдалы. Йөрәк, тире, кан әйләнеше системасы зәгыйфь. Ач торырга ярамый. 1-3 апрельдә берьеллык чәчәкләр чәчелә, күпьеллык чәчәкләрнең бүлбеләре бүленә һәм үрдерергә куела.
2 апрель (пәнҗешәмбе). Җөмәдел ахир аеның 13 нче көне. 14 нче Ай тәүлеге. Ай Кыз йолдызлыгында, 16.16 сәгатьтә калка, 4.27 сәгатьтә бата. 2 нче фаза. Көн озынлыгы 13.10 сәгать.
Иң әһәмиятле эшләрне башлау өчен уңайлы көн. Теләсә нинди вак-төяккә игътибарлы булу сорала. Сизү әгъзалары, ашказаны асты бизе зәгыйфь. Борчак, фасоль, арпа, балан ашау файдалы. Ач тору уңай нәтиҗә бирә.
Холецистит интектерсә
Шиңмәс гөл (бессмертник), сары мәтрүшкә, ромашка һәм бөтнек үләннәрен тигез микъдарда кушып, 2 аш кашыгы җыелманы ярты литр кайнар суда 15 минут төнәтәләр, сөзәләр, көненә 3 тапкыр, ашар алдыннан, яртышар стакан эчәләр.
3 апрель (җомга). Җөмәдел ахир аеның 14 нче көне. 15 нче Ай тәүлеге. Ай Үлчәү йолдызлыгында, 17.21 сәгатьтә калка, 4.47 сәгатьтә бата. 2 нче фаза. Көн озынлыгы 13.14 сәгать.
Авыр энергетикалы көн. Тыелгысыз хисләр күңелсез вакыйгаларга китерергә мөмкин. Тәэсирләнүчән кешеләргә бигрәк тә кыен. Эчәклек, талак, ашказаны асты бизе зәгыйфь. Ач тору, организмны чистарту уңай нәтиҗә бирә.
Әфлисунлы шарлотка
3 йомырканы 1 стакан шикәр белән блендерда туглап күпертәләр, әкренләп 1 стакан он кушалар. Озак итеп туглыйлар. Пергамент җәелгән табага чистартып өлешләргә бүленгән 2 әфлисунны матурлап тезеп, өстенә камырны агызалар, 200 градуслы газ мичендә 30 минутлап пешерәләр.