Rusiyeniñ mahkemesi Yaltadaki «Hizb ut-Tahrir» işi figurantınıñ daa sert bir madde boyunca muhakeme etilmesini istey
Rusiye advokatı Aleksey Ladinniñ Qırım.Aqiqatqa bildirgenine köre, mahkeme qabaatlayıcılardan Bekirovnıñ areketlerine Rusiye Cinayet kodeksiniñ 205.5 maddesiniñ 1-nci qısmı («terroristik teşkilâtnı teşkil etüv») boyunca qıymet kesmekni istedi.
Mahkeme öz qararını, daa evel mahkemede Bekirov qaravul olıp çalışqan Qızıltaş (Krasnokamenka) mektebinden alınğan videonıñ baqılması ile añlattı. Mahkemeniñ versiyasına köre, qırımtatar mektep binasında toplaşuvlar teşkil ete ve «işniñ» diger figurantlarına buyruqlar bere edi.
Aynı zamanda Rusiye prokurorı, bütün qabaatlanğanlar ve olarnıñ qorçalayıcıları mahkemeniñ bu qararına qarşı çıqtılar.
Ladin: «Bu uquqiy nonsenstir: akem cinaiy işni baqıp çıqqan soñ qabaatlanğanlardan biriniñ daa sert madde boyunca qabaatlı olğanına dair neticege keldi. Bu ise printsip olaraq yasaqtır. İmayeniñ umumiy fikrine köre, mahkeme öz üstüne devlet qabaatlavı vazifesini yükledi ve amelde öz qararı ile prokuraturanı, kvalifikatsiyanı daa sert şekline deñiştirmege zorlay», – dep izaladı.
Qabaatlanğanlarnıñ imayesi mahkemeniñ qararına qarşı şikâyet berecek ola.
Mayısnıñ soñunda Şimaliy Kavkaz okrugınıñ arbiy mahkemesi Yaltadaki «Hizb ut-Tahrir işi»niñ altı figurantınıñ tevqif müddetini üç ayğa uzattı.
Bu iş boyunca qabaatlanğan Arsen Cepparov, Refat Alimov, Emir-Useyin Kuku, Muslim Aliyev, İnver Bekirov ve Vadim Siruk 2016 senesiniñ fevral-aprel aylarında Yaltada yaqalandılar. Olarnı Rusiyede yasaq etilgen «Hizb ut-Tahrir» siyasiy İslâm teşkilâtına alâqadar olğanlarında qabaatlaylar.
Rusiye arbiy mahkemesi Yaltadaki «Hizb ut-Tahrir işi»ni Aqmescitte ötkerilgen köçüci oturışuvlarında baqa edi. Ondan soñ tevqif etilgen Qırım sakinlerini Rostov-na-Donu şeerine yolladılar.
Ukraina Tış işleri nazirligi Rusiyeden Yaltadaki «Hizb ut-Tahrir işi» figurantlarınıñ azat etilmesini talap ete.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarınıñ qullanılmasını red ete ve Rusiyede aqsız olaraq taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» tanılğan 15 birleşmeniñ cedveline kirsetti.
«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, olar diniy alâmetke köre taqip etile, dep sayalar. Advokatlar, Rusiye uquqqoruyıcı organları tarafından bu iş boyunca taqip etilgenlerniñ çoqusı qırımtatar olğanını ve olarnen beraber İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleriniñ taqip etilgenini qayd eteler. Halqara uquq işğal etilgen territoriyada işğal etken devletniñ qanunlarını işletmekni yasaq ete.