Кечқурун соат 9 дан кейин спиртли ичимлик сотиш тақиқланиши мумкин
Ўзбекистон бош вазири Абдулла Арипов 11 август куни бўлиб ўтган селектор йиғилишида тунги вақтларда дўконлар, кафе ва ресторанларда спиртли ичимликларни сотишга чеклов киритишни топширган.
Чакана савдода 21:00 дан, умумий овқатланиш муассасаларида ва тантанали маросимларни ўтказишда 23:00 дан кейин алкогол маҳсулотларини сотишни тақиқлаш режалаштирилмоқда.
Вазирлар Маҳкамасидаги ахборот манбаси маълумотларига кўра, лойиҳа шу вақтгача ишлаб чиқилган бўлиб, унинг «Аурум 898» тунги клубида таниқли спортчининг ўлими билан тугаган ҳодисага алоқаси йўқ.
Сайт манбасининг маълум қилишича, ҳужжат маст ҳолатда содир этилаётган жиноятлар даражасини пасайтиришга қаратилган. ИИВ маълумотларидан иқтибос келтирар экан, у жинсий зўравонликларнинг 25 фоизи ва қотилликларнинг 16 фоизи алкогол таъсирида содир этилганини маълум қилди.
Мамлакатнинг турли ҳудудларида спиртли ичимликлар сотиш билан шуғулланувчи дўкон сотувчиларининг маълум қилишича, улар маҳаллий ҳукумат органларидан 21:00 дан кейин спиртли ичимликларни сотиш тақиқлангани ҳақидаги огоҳлантиришни олиб улгуришди.