ولسمشر غني: د ولسمشرۍ انتخاباتو نېټه دې ژر وټاکل شي
د ولسمشر مرستیال ویاند شاه حسین مرتضوي تېر ماښام ازادي راډیو ته وویل چې ولسمشر دا خبره د یکشنبې په مازدیګر د انتخاباتو د خپلواک کمېسیون له استازو سره په هغه غونډه کې مطرح کړه چې د افغانستان لپاره د ملګرو ملتونو د سرمنشي ځانګړی استازی، د اروپایي اتحادیې استازی او د یو شمېر مرسته کوونکو هېوادونو سفیران هم حاضر وو.
نوموړی وايي:
"د ملي وحدت حکومت مشرتابه د انتخاباتو له خپلواک کميسیونه څو غوښتنې درلودې:
یوه یې دا وه چې د نوم لیکنې د پروسې په اړه خلکو ته معلومات ورکړي او د ګوندونو، مدني ټولنې او نړیوالو همکارانو د څارنې لپاره زمینه برابره شي.
دوهمه غوښتنه دا چې له کمېسیونه یې وغوښتل چې ژر تر ژره د ولسمشرۍ انتخاباتو د ترسره کېدو نېټه د افغانستان له خلکو سره شریکه کړي."
ولسمشرۍ ماڼۍ ټینګار کړی چې په انتخاباتو کې د حکومتي کارکوونکو په ګډون د هرچا مداخله جرم بلل کېږي او حکومت به په دې بهیر کې د دولتي کارکوونکو د مداخلې د مخنیوي لپاره لازم تدابیر ونیسي.
د افغانستان د اساسي قانون له مخې د ولسمشر دنده په رسمي ډول د راتلونکي هجري لمریز کال د جوزا / غبرګولي پر لومړۍ نېټه پای ته رسېږي.
تردې وړاندې د افغانستان د انتخاباتو خپلواک کمېسیون ویلي و چې د ولسي جرګې او ولسوالیو شوراګانو انتخاباتو لپاره د روانو کارونو تر څنګ راتلونکې ولسمشرۍ انتخاباتو ته هم آماده ګي لري او د دوی په خبره تخنیکي چارې یې له وړاندې پیل شوي دي.
دغه کمېسیون ویلي و چې په پام کې لري ولسمشرۍ انتخابات د راتلونکي کال په حمل میاشت کې ترسره کړي.