Qırımda mahkeme «Veciye Kaşka işi» figurantlarını apiste qaldırdı (+ video)
Böylelikle, muhakeme etilgen şahıslar tahqiqat izolâtorında iyül 15-ke qadar qalacaqlar.
Qabaatlav, Degermenci, Çapuh, Ametov ve Trubaç «Ukraina territoriyasına qaçmaq, şaatlarğa tesir etmek, delillerni yoq etmek mümkünler», dep iddia etti. Qorçalav, mahkemeniñ cinaiy işniñ figurantlarına berilgen müsbet hasiyetnameler, sağlıq vaziyetleri, yaşı ve sabit içtimaiy bağlarını köz ögüne almağanını qayd etti.
Degermenci mahkemede: «Mende bir top ağır, sürekli hastalıq – yürekniñ işemiya hastalığı ve astma bar. Ekimler tarafından sağlığımnıñ teşkerilüvi yapılıp, maña tahqiqat izolâtorında bulunmaq mümkün olmağanını tasdiqladı. Men üçünci gruppa saqatı olam», – dep añlattı.
Çapuh oturışuvda: «Altı aydan berli tahqiqat izolâtorınıñ hastahanesinde [bulunam]. [Mende] mikroinsult oldı, ale daa onıñ tesirinde olğan ağırlaşuv [keçmedi]. Ayaqta zornen turam, aytqan şeylerim zornen añlaşıla», – dedi.
İmaye, sıñırlav tedbiriniñ digerine, azatlıqtan marum etüv ile bağlı olmağanına deñiştimekni istedi.
Degermenci oturışuvda: «Men bir yerge qaçmaq istemeyim ve qaçmaycağım, şaatlarğa tesir etmege çarem yoq, çünki olardan kimseni tanımayım. Tahqiqat 6 ay içinde menim iştirakim ile iç bir areket yapmadı. Er bir oturışuvğa, bu tahqiqatçınıñ, ne de olsa, doğrusını tayin etecegine ümüt etip kelem. Lâkin şimdilik iç bir şey deñişmedi. Men mesüliyetten qaçmayım, özümni normal alda olıp qorçalamaq içün evde sağlığımnı biraz tüzetmek isteyim. Tahqiqat izolâtorınıñ şaraitinde bunıñ içün kerçek imkânlar yoq», – dedi.
2017 senesi noyabr 23-te Aqmescitte Rusiye telükesizlik hadimleri bir gruppa qırımtatarlar – Kâzim Ametov, Asan Çapuh, Ruslan Trubaç ve Bekir Degermencini yaqaladılar.
Olarnı, Türkiye vatandaşından aqsız yerde para talap ettiler, dep şübheli tanıdılar. Yaqalanuvları esnasında qırımtatar milliy areketiniñ veteranı Veciye Kaşka yaramadı. Daa soñra qadın vefat etti.
Daa evel, bu işniñ figurantlarında sağlıq ile ciddiy problemalar olğanı bildirilgen edi. Bekir Degermencide sürekli astma bar. Çapuh tahqiqat izolâtorında mikroinsult keçirdi.
İlhaqtan soñ Qırımdaki faktik Rusiye akimiyeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.