Ամեն պահի կարող են ռազմական գործողություններ սկսել․ ռազմական փորձագետը՝ Զաքիր Հասանովի հայտարարության վերաբերյալ
Ռազմական փորձագետ Արթուր Եղիազարյանի խոսքով՝ Ադրբեջանի ղեկավարությունը միշտ էլ հայտնի է իր ամպագոռգոռ հայտարարություններով, սակայն դա, ըստ նրա, մեզ իրավունք չի վերապահում, որ ցանկացած հայտարարության վերաբերվենք՝ ուղղակի որպես խոսքի: Նա Tert.am-ի հետ զրույցում նշեց` պատերազմ սկսելու մասին հայտարարություններով գուցե Ադրբեջանն իր ներքին սպառման խնդիրն է լուծում, բայց ամեն դեպքում, պետք է հաշվի առնենք՝ կա հրապարակային ասված խոսք, և դա չպետք է անտեսվի:
«Կարծում եմ՝ ոչ միայն բանակը պետք է լավ պատրաստ լինի, եթե հակառակորդը փորձի որոշ գործողություններ իրականացնել, այլ նաև պետք է, որ դիվանագիտական ճանապարհով փորձենք այդ գործողություններին պատասխանել հնարավոր բոլոր հարթակներում»,- ասաց նա:
Հիշեցնենք, որ Զաքիր Հասանովը հայտարարել էր, թե նախագահ Իլհամ Ալիևն իրենց առջև խնդիր է դրել՝ ապահովել բանակի պատրաստվածությունը իրական ռազմական գործողություններին:
«Մեր նպատակն է՝ նախապատրաստել բանակը պատերազմի համար, և այսօր ադրբեջանական բանակն արդեն պատրաստ է ազատագրել օկուպացված տարածքները: Բանակը պատրաստ է նաև հոգեբանորեն»,- ասել է Հասանովը, թվարկելով վերջին շրջանում ադրբեջանական զինուժի «ձեքբերումները»: Հասանովը, մասնավորապես, պնդել է, թե «ազատագրվել է 11 հազար հեկտար տարածք»:
Արթուր Եղիազարյանի խոսքով՝ պետք է աշխարհին ներկայացնենք, որ մենք կողմ ենք Ղարաբաղյան հիմնախնդրի խաղաղ կարգավորմանը, բայց հստակ է՝ Ադրբեջանն է փորձում խոչընդոտել դրան:
Ըստ ռազմական փորձագետի՝ չենք կարող լուրջ չվերաբերվել Ադրբեջանի հայտարարություններին, որովհետև տեսնում ենք սահմաններում զենքերի կուտակումներ, որոշակի զորքերի տեղաշարժեր:
«Միգուցե դրանք հնարքներ են: Բայց չպետք է մոռանանք, որ Ապրիլյան պատերազմից առաջ էլ նման հնարքների դիմում էին, և հանկարծակի անցան ռազմական գործողության: Սա իրենց մարտավարությունն է»,-ասաց նա՝ նշելով, որ անկեղծորեն չի հավատում, որ ադրբեջանական կողմը ռազմական գործողություններ կսկսի հայտարարություններից անմիջապես հետո,-«Ադրբեջանն այն պետությունը չէ, որ հայտարարությունից հետո ասպետական կերպով մոտենա հարցին, կարող է, իհարկե, նաև չհայտարարել և պատերազմ սկսել»:
Արթուր Եղիազարյանը նկատեց՝ այնպես էլ չէ, որ պատերազմն ավարտվել է հայկական կողմի համար: «Ամեն պահի կարող են ռազմական գործողություններ սկսվել: Ակնհայտ տեսնում ենք՝ Հայաստանի հետ սահմաններում կուտակումներ կան, նախիջևանյան կողմում չեզոք գոտու հաշվին նրանք լուրջ տեղաշարժեր են արել, հիմա այնտեղ ամրաշինական աշխատանքներ են անում, և Արարատի մարզից դեպի Սյունիք տանող ճանապարհի որոշ հատվածներում ռազմավարական առումներով սպառնալիքներ կան․ եթե վաղը պատերազմական գործողություններ լինեն՝ բնականաբար, լուրջ վտանգ է ստեղծվելու»,- ասաց ռազմական փորձագետը՝ հավելելով, որ հայկական կողմն այս պարագայում պետք է և՛ ռազմական, և՛ դիվանագիտական գործողություններ իրականացնի խաղաղություն ապահովելու համար:
Արթուր Եղիազարյանի դիտարկմամբ՝ հայկական դիվանագիտական կառույցի կողմից այս ուղղությամբ տարվող լուրջ քայլեր չեն նկատվում:
«Գոնե հանրությանը տեսանելի հարթակում չկա նման աշխատանք»,- ասաց նա:
Իսկ ինչ վերաբերում է բանակին, ապա այն, փորձագետի կարծիքով, ինչ-որ քայլեր անում է: «Զինվորական գործն այնպիսին է, որ չպետք է հրապարակային երևա, դրանով իրեն կվտանգի: Բայց, ամեն դեպքում, կարծում եմ՝ մեր զգոնությունն ամեն առումով պետք է մեծացնենք: Նույնիսկ պետք է պահեստազորի մոբիլիզացիոն գործողություններ իրականացնել՝ պատրաստվելու համար»,- ասաց նա:
Արթուր Եղիազարյանի խոսքով՝ այս պահին, առաջին հերթին ԵԱՀԿ Մինսկի խմբին պետք է դիմել, պետք է նրանցից արձագանք ակնկալել Ադրբեջանի ներկայիս հայտարարությունների վերաբերյալ:
Դիտարկմանը, թե ինչ արդյունք կտա հայկական դիվանագիտական աշխատանքը, եթե այնուամենայնիվ երկրներն իրենց շահերով են առաջնորդվել միշտ և հիմա էլ ԵԱՀԿ Մինսկի խումբը հերթական կանկատեսելի, անհասցե հայտարարությունները կանի, ռազմական փորձագետը նշեց․ «Մենք միջազգային ընտանիքի անդամ ենք և պահում ենք միջազգային նորմերը, բայց միշտ պետք է հաշվի առնենք, որ առաջին հերթին մեր հույսը մեր վրա պետք է դնենք: Բոլորն ունեն իրենց շահերը, և այո, կարող են աչք փակել: Հայոց ցեղասպանությունից հետո անցել է հարյուր տարի, և հիմա էլ եզդի ժողովրդի ցեղասպնությունն է տեղի ունենում, և աշխարհը, ինչպես հարյուր տարի առաջ՝ իր շահերից ելնելով, այնպես էլ հիմա, աչք է փակում: Սխալ կլինի, որ մենք ապավինենք, որ միջազգային հանրությունում մեր հարցը կլուծեն: Մենք պետք է ուժեղ լինենք, հաղթող լինենք, իսկ հաղթողին ոչ թե դատում են, այլ հետը հաշվի են նստում»,- ասաց նա: