Նորվեգիան ԱՄՆ-ին հորդորելու է կրկնապատկել իր տարածքում գտնվող ամերիկացի զինծառայողների քանակը

Այս մասին հայտնել են Նորվեգիայի արտաքին գործերի և պաշտպանության  նախարարները: Այս տարվա վերջին  Նորվեգիայից  հեռանալու է  ամերիկյան  ծովային հետևակայինների 330 հոգանոց զորախումբը, որը 2017-ի հունվարից գտնվում էր Նորվեգիայում: Երկրորդ համաշխարհային պատերազմից հետո, սա առաջին դեպքն էր, երբ ՆԱՏՕ-ի անդամ Նորվեգիայում օտարերկյա ուժեր են  տեղակայվել: Օսլոն հիմա խնդրում է գալիք տարվա սկզբից 700 ամերիկյան ծովային հետևակայիններ ուղարկել Նորվեգիա, որոնք կտեղակայվեն Ռուսաստանի հետ  սահմանային շրջանում: Արտաքին գործերի նախարարը միաժամանակ նշել է, որ դա չի նշանակում  Նորվեգիայի տարածքում  ամերիկյան մշտական ռազմակայնի ստեղծում:


2014-ին Ռուսաստանի կողմից Ղրիմը բռնակցելուց հետո  ՆԱՏՕ-ի արևելյան թևի երկրներին անհանգստացնում է սեփական անվտանգությունը և նրանք պարբերաբար դիմում են  ՆԱՏՕ-ին, կամ անմիջապես ԱՄՆ-ին՝ հորդորելով ավելացնել  զորքերի քանակը  իրենց երկրներում: Անցած շաբաթ ՆԱՏՕ-ի անդամ արևելաեվրոպական  ինը երկիր նման հորդորով  դիմել են ՆԱՏՕ-ին:


Նորվեգիայում ամերիկյան զորախմբի ավելացումը կարող է լարվածություն առաջացնել ռուս-նորվեգական հարաբերություններում: