Ես կարծում եմ, որ մարզպետների կազմն ամբողջությամբ կփոխվի. Նիկոլ Փաշինյան (տեսանյութ)
19:42
Նիկոլ Փաշինյանն արձանագրեց, որ տնտեսության վիճակի պետական վերլուծությունը փաստում է, որ տնեսությունն ունի դրական միտումներ և դրական սպասումներ, և այդ սպասումները պետք է կոնկրետ իրականություն դառնան:
Նա նշեց, որ այս օրերին տասնյակ և հարյուրավոր CV-ներ է ստանում, այդ թվում՝ Սփյուռքից, և նախ ողջունեց մարդկանց, որ այդ քայլերն են անում, սակայն կոչ արեց զինվել համբերությամբ:
«Տնտեսության զարգացման ամենակարևոր խնդիրն օրինականությունն է, անկախ դատական համակարգը և մրցակցային դաշտը, քաղաքական առումով մենք այսօր դա ունենք. մնում է՝ դրա գոյությունն ամրապնդվի և վստահություն դառնա մարդկանց մոտ, և այդ ամեն ինչը կկարգավորվի»,- ասաց նա:
Վարչապետը նշեց, որ շատ ճիշտ են ընդդիմության և քաղհասարակության պնդումները, որ երբեմն Կառավարությունը տնտեսությունը զարգացնելու համար մի բան ունի անելու` չխանգարել այդ պրոցեսին: «Մենք առաջինը չենք խանգարի տնտեսության զարգացմանը և կօգնենք ամեն ինչում»,- ասաց նա:
Ինչ վերաբերում է տնտեսական աճի ցուցանիշ սահմանելուն, ինչպես նախկին վարչապետների առաջ դրվում էր, նա ասաց. «Ես չեմ ուզում կոնկրետ ծուղակ ինքներս մեզ համար լարենք, վստահություն ունեմ, որ Կառավարությունն իր առաջ դրված բոլոր խնդիրները լիարժեք կլուծի: Մենք պետք է հասկանանք, որ այդ խնդիրները լուծելիս չենք պատրաստվում չմտածված քայլեր անել, և նաև քաղբանտարկյալների հարցում չենք մտածում չմտածված քայլեր անել»,- ասաց նա:
19:30
Անդրադառնալով ԱՎԾ պետի վերանշանակման վերաբերյալ քննադատություններին՝ Նիկոլ Փաշինյանն ասաց. «Նրանց մեղադրում էին թվեր նկարելու մեջ, մենք սրանով, ըստ էության, հակակշիռ ստեղծեցինք. ոչ թե մեր մարդկանց նշանակեցինք ազգային վիճակագրական ծառայության ղեկավար կազմում, այլ փորձեցինք հակակշիռ ստեղծել Կառավարության և վիճակագրության միջև, որպեսզի որևէ մեկը որևէ մեկի համար թիվ նկարելու պարտավորությամբ կաշկանդված չլինի»,- ասաց նա և նշեց, որ չի ակնկալում, որ կադրային նշանակման հետ կապված որևէ քննադատություն չպետք է լինի:
«Ես առաջարկում և խնդրում եմ, որ արձանագրենք այն կետը, որից նրանք սկսել են աշխատել այդ կարգավիճակում և փորձենք հետևել պարտավորությունների կատարմանը»,-ասաց նա և առաջարկեց նաև, որ հանրությունը որպես գործոն, այդ թվում՝ լրատվամիջոցները, լիարժեք վերահսկողություն իրականացնեն:
Անդրադառնալով մարզպետների նշանակման հարցին՝ վարչապետն ասաց. «Ես կարծում եմ, որ մարզպետների կազմն ամբողջությամբ կփոխվի»:
Անդրադառնալով Tert.am-ի՝ ընտրական օրենսգրքին վերաբերող հարցին, թե երբ այն պատրաստ կլինի, Նիկոլ Փաշինյանն ասաց, որ կփորձեն հնարավորինս արագ, բայց անշտապ ներկայացնել նախագիծը, որպեսզի «ափալ-թափալ» գործողություններ չանեն:
Խոսելով ԿԸՀ-ի անդամների, նախագահի մասին՝ նա նկատեց, որ ԿԸՀ-ն անկախ մարմին է, բայց սիմվոլիկայի առումով կան խնդիրներ, որոնք պետք է լուծվեն:
Անդրադառնալով այսօրվա միջոցառումը` երդմնակալության արարողությունը, ի սկզբանե լրատվամիջոցներից փակ անցկացնելու որոշմանը և հետո այդ որոշումը փոխելուն՝ Նիկոլ Փաշինյանն ասաց, որ միջոցառումից կես ժամ առաջ է իմացել, որ այն փակ է լինելու և ՀՀ նախագահի հետ խորհրդակցելով՝ որոշել են ֆորմատը փոխել:
Նա նշեց, որ ըմբռնումով է մոտենում, որ նախկին նախագահները չեն շնորհավորել իրեն: Հարցին, թե չի կարծում՝ նեղացած են, վարչապետը պատասխանեց. «Ես չեմ կարծում, որ այսօր Հայաստանում պետք է նեղացած մարդիկ լինեն»:
Անդրադառնալով Սոչի կատարած այցին՝ Փաշինյանը նշեց, որ այն անցել է բարձր մակարդակով, երկկողմ, բազմակողմ հարաբերություններին առնչվող բոլոր հարցերը քննարկվել են, կողմերը ներկայացրել են իրենց դիրքորոշումները, հանդիպումների ողջ ընթացքը եղել է դրական մթնոլորտում, կառուցողական խոսակցություն է տեղի ունեցել, և շատ արագ արձանագրվել է, որ կա նորմալ աշխատանքային, բարեկամական մթնոլորտ:
Ինչ վերաբերում է ԱԱԾ բացահայտումների արդյունքում պատասխանատվության ենթարկելուն՝ նա ասաց. «Մեր քաղաքական դիրքորոշումն այն է, որ մենք գիլյոտիններ չենք պատրաստվում շարել Երևան քաղաքում, եթե կա պետության հասցրած վնաս՝ խնդիրն այդ վնասի վերականգնումն է, և քրեական օրենսգիրքն ունեն մի շարք պրոցեդուրաներ, որոնք տարբեր լուծումների հնարավորություն են տալիս»,- ասաց նա և նշեց, որ ամեն գործի ելք կախված է գործի հանգամանքներից:
Խոսելով ԱԱԾ-ի պետի, պաշտոնյաների ուղիղ հեռարձակումների հետ կապված մտահոգություններից, և անդրադառնալով հարցին, թե կոնկրետ իր վերաբերյալ նման մտահոգություն հայտնել է, վարչապետն ասաց, որ չի կարծում՝ ԱԱԾ տնօրենը վարչապետի գործողությունների հետ կապված կարող է որևէ մտահոգություն ունենալ:
---------------------------
Ես շնորհավորում եմ և հաջողություն եմ մաղթում վարչապետին, կառավարությանը և մեր ողջ ժողովրդին:
Այս մասին Կառավարության անդամների երդմնակալության արարողությունից հետո ՀՀ նախագահ Արմեն Սարգսյանը հրաժեշտ տալիս ասաց ՀՀ վարչապետ Նիկոլ Փաշինյանին:
Այնուհետև վարչապետը պատասխանեց լրագրողների հարցերին և նշեց, որ այս արարողության հանդիսավոր բնույթը կարևոր նշանակություն ունի, ժողովրդի առաջ երդվելու արարողությունը՝ նույնպես :
«Ես արդեն 13 օր վարչապետի կարգավիճակում եմ և ինձ համար շատ կարևոր էր երդման տեքստն ընթերցելիս վերլուծել այս տասներեք օրերի ընթացքը, և ուրախ եմ, որ ճշգրիտ վարվել եմ այնպես, ինչպես նախատեսված է այդ երդման տեքստում»,- ասաց նա:
Անդրադառնալով արտահերթ ընտրություններին և Կառավարության երկարաժամկետ ծրագրերին՝ Նիկոլ Փաշինյանն ասաց.
«Արտահերթ ընտրությունները առաջնահերթություն են մեզ համար, բայց դա չի նշանակում, որ դա միակ խնդիրն է, որ մենք պետք է լուծենք: Կառավարությունը պետք է բնականոն գործի, կառավարությունը ունի և ունենալու է երկարաժամկետ ծրագրեր, ինչը չի նշանակում, որ մեկը մյուսին հակասում է: Ի վերջո, արտահերթ ընտրություններում այս կառավարությունը նույնպես հանդես է գալու, թե ինչ ֆորմատով՝ դա արդեն ուրիշ խնդիր է»:
Ազգային անվտանգության ծառայության վերաբերյալ նա ասաց, որ և՛ ծառայությունը, և՛ մյուս մարմինները լիարժեք պետք է կատարեն իրենց գործառույթները, և սրանով ամեն ինչ ասվել է:
«Ազգային անվտանգության ծառայության տնօրենն արել է հայտարարություններ, երբ կլինեն կոնկրետ գործողություններ, հանրությունը կիրազեկվի: Հույս ունեմ, որ դուք չեք ակնկալում, որ ես պետք է ինչ-որ օպերատիվ տեղեկություններ բացահայտեմ»,- ասաց նա և նշեց, որ շատ մանրամասների մեջ չի մտնում, քանի որ կարծում է, որ ԱԱԾ պետը պետք է իր գործառույթներն անի:
Հարցին՝ եթե բացահայտումները վերաբերեն իր գործընկերներին, ապա դա անաչառության վրա կազդի, Նիկոլ Փաշինյանն ասաց. «Եթե նույնիսկ բացահայտվի, որ իմ ընտանիքի մեջ կան այդպիսի մարդիկ, որևէ բան չի փոխվի»: