ԱԱԾ տնօրենի հայտարարությանը պետք է հաջորդեն ձերբակալություններ. Գորգիսյան
Գորգիսյանը նշեց՝ եթե ԱԱԾ-ին հայտնի է, որ ինչ-որ կառույցներում եղել է կոռուպցիա, ուրեմն կոռուպցիայով զբաղվողները պետք է միանշանակ պատժվեն։
Հիշեցնենք՝ Ազգային անվտանգության ծառայության նորանշանակ տնօրենը լրատվամիջոցների հետ հանդիպման ժամանակ բավական ուշագրավ հայտարարություն արեց՝ ասելով, որ իր ունեցած տեղեկություններով, վարչապետ Փաշինյանի ընտրվելուց հետո ավանդական կոռումպացված հիմնարկներն ամբողջությամբ դադարեցրել են իրենց հակաօրինական գործունեությունը։
«Այսօր, իմ ունեցած ինֆորմացիայով, վարչապետի (Փաշինյանի) ընտրվելուց հետո, ավանդական կոռումպացված հիմնարկները ամբողջությամբ դադարեցրել են իրենց հակաօրինական գործունեությունը… Մաքսային, ոստիկանության որոշ ստորաբաժանումներ, դատական համակարգ, Հարկային...», - ասել է Վանեցյանը։
«Ազատություն». - Դուք ինչպե՞ս եք գնահատում այս հայտարարությունը՝ հաշվի առնելով, որ առաջին անգամ ԱԱԾ տնօրենի կողմից մատնանշվում են այն մարմինները, որտեղ, ըստ իր ձևակերպմամբ, ավանդաբար եղել է կոռուպցիա։
Գորգիսյան. - Կարծում եմ, որ այդ ձևակերպմանը պետք է հաջորդեն ձերբակալություններ, որովհետև, եթե ԱԱԾ-ին հայտնի է, որ ինչ-որ կառույցներում եղել է կոռուպցիա, ուրեմն կոռուպցիայով զբաղվողները պետք է պատժվեն միանշանակ, այլ մոտեցում լինել չի կարող, որովհետև այլ մոտեցումը կբերի լուռ համաձայնության, որ կոռուպցիան կարելի է, կամ բոլոր նախկինում գործած մեղքերի ներմանը, որը չեմ կարծում, որ մեր հասարակությունը, գոնե կընդունի։
«Ազատություն». - Այսինքն՝ դա Նիկոլ Փաշինյանի ասած, որ վենդետա չի լինելու, դրա շրջանակներից դուրս կլինի այդ ձերբակալությունները։
Գորգիսյան. - Օրենքի խախտումը չի կարելի դիտարկել որպես վենդետա, կամ նման մի բան, վենդետա կլիներ, եթե պարոն Փաշինյանը գար և ասեր, որ այլևս Սամվել Ալեքսանյանն այլևս չի ներմուծելու շաքարավազ, ներմուծելու է միայն, ենթադրենք, Արարատ Միրզոյանը, դա կլիներ վենդետա, եթե անօրինական ճանապարհներով որոշ գործարարներից ունեցվածքի բռնագանձում տեղի ունենար, դա կլիներ վենդետա։ Խոսքը հիմա գնում է օրինականության սահմաններում օրենքի առաջ բոլորի հավասարության մասին։ Եթե մարդիկ օրենքը խախտել են, լինի դա ցանկացած զանցանք՝ կոռուպցիա, պաշտոնական դիրքի չարաշահում, մարդ սպանել, թե բռնաբարել, դրանք բոլորը օրենքի խախտումներ են և ցանկացած մարդ պետք է պատժվի, եթե կատարել է օրենքի խախտում։
«Ազատություն». - Պարոն Գորգիսյան, համամիտ չե՞ք, որ նաև խնդրահարույց է ԱԱԾ տնօրենի այս հայտարարությունն այն առումով, որ ի վերջո նա երկար տարիներ հենց այդ համակարգում է աշխատել, բարձր պաշտոններ է զբաղեցրել, ինչպե՞ս է ստացվել, որ նա այդ ամենը տեսել և լռել է, և միայն այսօր է բարձրաձայնում։
Գորգիսյան. - Գիտեք, պարոն Փաշինյանի վարած կադրային քաղաքականությանը ես չեմ կարող հիմա գնահատական տալ, բայց ենթադրաբար կարծում եմ, որ նա տալիս է երկրորդ հնարավորություն այն մարդկանց, ովքեր նույն Օսիպյանի վերանշանակմամբ, ովքեր եղել են համակարգում, ծանոթ են համակարգի խնդիրներին, հիմա ունեն հնարավորություն էդ խնդիրները շտկելու։ Կարծում եմ, որ սա պետք է էդ տեսանկյունից դիտարկել, և հիմա պետք է ուղղակի սպասել աշխատանքի, որովհետև հայտարարությունները լավ բան են, բայց միայն աշխատանքն է գնահատվում։
«Ազատություն». - ԱԱԾ տնօրենը չպե՞տք է ասի, թե ինչո՞ւ էին այն ժամանակ լռել, ո՞ւմ ցուցումով են լռել, ի վերջո, կոռուպցիայի դեմ պայքարի համատեքստում դրանք կարևորագույն հարցադրումներ են։
Գորգիսյան. - Իհարկե, երբ որ ես ասում եմ, որ պետք է լինեն ձերբակալումներ, խոսքը վերաբերում է ամբողջ շղթայի մասին, որովհետև, եթե ձերբակալեն մաքսայինի աշխատողին, նա պետք է արդեն խոստովանի, որ գործել է հրահանգով, և սա շղթայական ռեակցիայով ուղղակի գնալու է, և եթե համակարգը գործի անթերի, գործի անաչառ, չի կարող որևէ օղակ դուրս մնալ պատժի ենթարկվելուց՝ մեկը մյուսի հետևից ուղղակի բացվելով գնալու է։
«Ազատություն». – Դուք հավատո՞ւմ եք, որ կլինեն այդօրինակ ձերբակալություններ։
Գորգիսյան. – Կսպասենք՝ կտեսնենք, ամեն դեպքում նման մոտեցմամբ, եթե սկսել է ԱԱԾ պետը, կարծում եմ, որ հաջորդ քայլը պետք է լինի դա, հակառակ դեպքում ուղղակի հասարակությունն արդարության վերականգնման զգացողություն չի ունենա, իսկ մեզ մոտ ամեն ինչ եղավ, որովհետև հասարակությունը հենց դրան էր կարոտ՝ արդարությունն էր փորձում վերականգնել, որովհետև իրեն խաբված էր զգում, եթե դա չլինի, լուրջ հիասթափություն կլինի նոր կառավարությունից։
«Ուրախ կլինեմ, եթե մենք կարողանանք արմատախիլ անել կոռուպցիան»
«Ազատություն». - Պարոն Բաբլոյան, ինչպե՞ս եք գնահատում կոռուպցիայի դեմ այն պայքարը, որն այժմ մեկնարկել է և ԱԱԾ-ն լուրջ բացահայտումներ է խոստանում անել։
Բաբլոյան. - Ուրախ կլինեմ, եթե մենք կարողանանք արմատախիլ անել կոռուպցիան։
«Ազատություն». - Ինչո՞ւ նախկին իշխանությունները, նախկին կառավարությունը չի պայքարել և չի բացահայտել այդ կոռուպցիոն սխեմաները։
Բաբլոյան. - Երբ որ կբացահայտվի, էն ժամանակ տարբերությունները կարող ենք գնահատել։