2017-ին հայերը թուրքական մամուլում վիրավորական արտահայտություններով հիշատակվել են 855 անգամ. Դինքի հիմնադրամի նոր զեկույցը

Թուրքիայում գործող Հրանտ Դինքի անվան հիմնադրամը հրապարակել է ատելության դրսևորումների մասին 2017 թվականի զեկույցը:

Զեկույցում տեղ են գտել ամբողջ տարվա ընթացքում թուրքական տարբեր լրատվամիջոցների գործունեության վերաբերյալ մոնիթորինգի արդյունքները, որոնք արտացոլում են Թուրքիայում ապրող տարբեր ազգային, կրոնական և այլ փոքրամասնությունների հանդեպ տեղական մամուլում ատելության դրսևորում համարվող խտրական կամ վիրավորական արտահայտությունների, կոչերի և եզրույթների կիրառումը, որն ազդում է երկրում հասարակական վերաբերմունքի վրա:

Ուսումնասիրությունը փաստել է, որ 2017թ.-ի ընթացքում թուրքական մամուլում ամենից շատ թիրախավորվել են հրեաները. նրանց հանդեպ գրավոր ատելության դրսևորումները տարբեր լրատվամիջոցներում հասել են 1.251-ի:
 
Հայերը թուրքական մամուլում վիրավորական արտահայտություններով հիշատակվել են 855 անգամ՝ ցուցակում հաջորդելով սիրիացի ներգաղթյալներին, որոնք մամուլում իրենց դեմ ատելության դրսևորման դեպքի զոհ են դարձել 1.148 անգամ:

Ցուցակում տեղ են գտել նաև հույները, բրիտանացիները, գերմանացիները, արաբները, ռուսները, նիդեռլանդցիները, ամերիկացիները, իրաքցիները, իրանցիները, այլք:

Ատելության ու խտրական վերաբերմունքի 543 դեպք է ֆիքսվել «քրիստոնյա» և 66 դեպք «աթեիստ» բառի կիրառմամբ:

Քրդերը մամուլում վիրավորական արտահայտություններով հիշատակվել են 80 անգամ՝ հայտնվելով ընդհանուր ցուցակի 14-րդ տեղում:

Ամենից շատ ատելության դրսևորմամբ արտահայտություններ, բառեր կամ եզրույթներ կիրառել է թուրքական «Յենի Աքըթ» պարբերականը, որի էջերում 2017թ.-ի ընթացքում տարբեր լուրերում և հոդվածներում 257 անգամ օգտագործվել են վիրավորական բառեր փոքրամասնությունների մի շարք խնդիրների վերաբերյալ:

Երկրորդ տեղում է «Միլլի Գազեթե»-ն, որտեղ ատելության դրսևորումներ են ֆիքսվել տարվա ընթացքում 231 անգամ:

Դրանց են հաջորդել «Յենի Մեսաժ», «Յենիչաղ» և «Միլաթ» պարբերականները՝ ատելության տարբեր դրսևորումների համապատասխանաբար 138, 135 և 131 դեպքերով:

Ցանկում տեղ են գտել թուրքական այնպիսի հայտնի և ընթերցվող պարբերականներ, ինչպիսիք են «Սթար»-ը, «Սյոզջու»-ն, «Յենի Շաֆաք»-ը, «Թյուրքիյե»-ն, «Այդընլըք»-ը և այլն:

Նշենք, որ ատելություն սերմանող հրապարակումների ու հոդվածների հրապարակման հարցում առաջատար հանդիսացող տվյալ պարբերականների զգալի մասը համարվում են իշխանամետ մամուլի ներկայացուցիչներ: