Herson vilâyetinde qırımtatar Navrez- bayramı yapıldı
Rıkovo köyünde 125 iştirakçi çıqış yapqan bayram kontserti ötkerildi. Olarnıñ arasında 11-ri aveskâr em de qırımtatar ve ukrain halq ansamblleri ve yırcılardır. Bayramnı akimiyet temsilcileri ve Hersondan kelgen musafirler ziyaret etti.
Yerli memuriyetniñ malümatına köre, mektep ve bala terbiye müessiselerinde sergiler açılıp, bala bağçalarınıñ qırımtatar gruppaları ile mekteplerde de açıq ders şeklinde bayram tedbirleri keçirilmesi planlaştırılğan edi.
«Bizler özümizniñ qırımtatar tarihı ve medeniyetimizni saqlamaq içün er şey yapamız. Ancaq ileride böyle tedbirlerni daa da büyük etip vilâyet seviyesinde keçirip, yerli ealige qırımtatar medeniyeti aqqında ikâye etip bermek ister, umumiy bayram keçirmege davet etmek ister edik. Bizim region bu meselede ilâve devlet yardımı, qırımtatarlar içün medeniyet programmalarına maddiy yardım berilmesine muhtac», – dep qayd etti Geniçesk rayon devlet memuriyeti reisiniñ muavini, Qırımtatar halqı Milliy Meclisiniñ azası Gülnara Bekirova.
Onıñ sözlerine köre, 2016 senesi Herson vilâyetiniñ Geniçesk rayonında meblâğnıñ bir qısmı zamanında sürgün etilip, Ukrainada yaşamaq içün avdet etken qırımtatarlar ve başqa millet vekillerini yerleştirmek, ukrain cemiyeti integratsiya yapmaq boyunca devlet programmasına binaen taqsimlengen. 2017 senesi Geniçesk rayonına para yollanılmadı, amma 2018 senesi programması boyunca yerli memuriyet, Herson regional Meclisinen uyğunlaştırıp, 2017 senesi Nazirler Şurasına teslim etken edi. Şimdi finansirlenmesini bekleymiz.
Yerli Meclislerniñ malümatına köre, Herson vilâyetinde 10 biñge yaqın qırımtatar yaşay ve olarnıñ toplu yerleşken yerleri Geniçesk rayonı etrafındadır.
Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep ilân etti. 2015 senesi oktâbrniñ 7-nde Ukraina prezidenti Petro Poroşenko münasip qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey.