Suşenko mayıs ayında azat etilebile – advokat
«12 cılıtlıq iş – pek büyük sayılmaz ve oldu olacağı, dört şaat bar, esas qabaatlatıcı ise – bir kişi. Başqa taraftan da Roman Suşenkonı deñiştirmege isteyler ve bunen bağlı körüşüvler devam ete. Halqara aracılar da celp etildi. Bu mesele mahkeme ketişatınen beraber yürsetilir ve er şey mayısta muvafaqiyetnen biter, dep ümüt etemiz», – dedi Feygin.
O, ayrıca, mart ayında Suşenkoğa «tsenzuradan keçken bir qısım mektüpler berildi, umumen alğanda 40qa yaqın, olar arasında merhum babasınıñ da dört mektübi bar».
Moskva şeer mahkemesi martnıñ 20-nde ukrain jurnalisti Roman Suşenkonıñ martnıñ 3—na qadar uzatılğan tevqif muddetini qanuniy dep tanıdı. Appelâtsion şikâyet red etilgen edi.
2016 senesi oktâbrniñ 3-nde Rusiye FSBsi ukrain muhbiri Roman Suşenkonı tutulğanı aqqında haber eterek, Ukraina Mudafaa nazirliginiñ ukrain istihbaratınıñ hadimi dep, Rusiye hususiy hızmet hadimleri iddasına binaen, devlet sırı dep sayılğan, silâlı quvetler ve Rusiye milliy gvardiyası aqqında malümat toplay eken.
Roman Suşenkonıñ özü mahkeme tevqif etilgeninden evel, altı yıl devamında Parijde resmiy olaraq yaşap, «Ukrinfom» haber agentliginiñ mahsus muhbiri olaraq çalışqanı aqqında haber etken edi. «Ukrinfom» Roman Suşenkonıñ 2002 senesinden başlap «Ukrinfom» haber agentliginde çalışqanını taqsdıqlap, casuslıqnen bağlı çeşit qabaatlavlarnı red etip, Moskvağa şahsiy işleri boyunca barğanında tatilde ekenligini qayd etken edi.