«Ֆուտբոլը Բարեկամության համար» կազմկոմիտեի անդամ Լևոն Ղասաբօղլյան. Հայաստանն ավելի ներկայանալի կլինի ծրագրում

«Ֆուտբոլը Բարեկամության Համար» միջազգային ծրագիրը մեծ թափ է հավաքում ամբողջ աշխարհում:

 

Այս տարի Հայաստանը ևս պատրաստակամորեն ներգրավված է աշխատանքներին: Ինչպես հայտնի է, ՀՖՖ-ում կայացել է կոնֆերանս, որին ներկա է եղել Անդրկովկասի և Միջին Ասիայի կազմկոմիտեի ղեկավար Ամինա Կոնուրբաևան: Այդ կազմկոմիտեի անդամ է Լևոն Ղասաբօղլյանը, ով նախորդ տարի ևս մասնակցել է հայտնի միջոցառմանը:

 

Armsport.am-ը զրուցել է Լևոնի հետ, ով խոսել է մանրամասներից.

 

«Ողջունելի է կազմակերպիչների պրոֆեսիոնալիզմը, որը տեսանք նախորդ տարի: «Ֆուտբոլը հանուն բարեկամության» կարգախոսը 100 %-ով աշխատում է: Երկրորդ կարգախոսն էլ «I can change the world». այս կարգախոսը ևս գործում է: Մենք այս տարի էլ ավելի ներկայանալի պետք է լինենք: Իմ կարգավիճակը փոքր-ինչ փոխվել է, ես նաև կազմկոմիտեի անդամ եմ, որի ղեկավարն Ամինան է: 

 

Նախորդ տարի մասնակցում էին 64 երկրներ, իսկ այս տարի՝ 211. սա պարտավորեցնող է: Այս տարի ներկա ենք լինելու Աշխարհի առաջնության բացման արարողությանը և Ռուսաստան-Սաուդյան Արաբիա հանդիպմանը:

 

Մեր երկրում աշխուժությունն ուրախացնում է: Մեր երկրում նախագիծն ընդունված է: Ինչպես հայտնի է, մենք 3-րդ անգամ ենք մասնակցում այս միջոցառմանը: 

 

Կազմվելու են 32 թիմեր, մեր ֆուտբոլիստը՝ Էրիկը խաղալու է «Lion» թիմում: Այս տարի կենդանիների անուններով են թիմերը, թեման բնապահպանական է: 

 

Լի ենք սպասումներով: Բոլորիս պարտավորեցնում է Հայաստան անունը»,- ասաց Ղասաբօղլյանը:

 

Խոսելով սպասվող միջոցառումների մասին՝ Լևոնն ասաց. «Սպասվում է մրցաշար 32 թիմերի մեջ: Բնական է, որ ցանկանում ենք մեր թիմը հաղթի: Մրցաշարից զատ մեր ֆուտբոլիստը և ընտրված լրագրողն ունեն գործառույթներ: Ունենալու են առաջադրանքներ, օրինակ Press Center-ում պատանի լրագրողներն աշխատելու են»:

 

«Առիթից օգտվելով՝ ցանկանում եմ շնորհակալություն հայտնել Հայաստանի ֆուտբոլի ֆեդերացիային, շնորհակալ եմ նաև «Արցախ» ակումբին ընդառաջելու համար: Շնորհակալ եմ նաև այն լրատվամիջոցներին, որոնք օգնում են մեզ»,- հավելեց Լևոն Ղասաբօղլյանը:

 

«Ֆուտբոլը բարեկամության համար-2018» միջոցառմանը Հայաստանի ներգրավվածությունը որոշվել է կոնկուրսով: Ընտրվել են մեկական ֆուտբոլիստ և լրագրող: Հայաստանը ներկայացնելու են Ավանի ֆուտբոլի ակադեմիայի սան Էրիկ Հարությունյանը և պատանի լրագրող Սամվել Գևորգյանը:

 

«Ֆուտբոլը բարեկամության համար» ծրագիրը ստեղծվել է «Գազպրոմ» ընկերության կողմից 2013 թվականին: Ծրագրի հիմնական արժեքներն են ընկերությունը, հավասարությունը, առողջությունը, արդարությունը, խաղաղությունը, նվիրվածությունը, հաղթանակը, ավանդույթները և պատիվը: Ծրագրի մասնակիցներն են պատանի ֆուտբոլիստները, ինչպես նաև պատանի լրագրողները: Հինգ տարվա ընթացքում ծրագրին մասնակցել է 3,7 հազար պատանի: 2018 թվականին ծրագրի մասնակից են լինելու 211 երկրների և տարածաշրջանների ներկայացուցիչներ: