Վրաց ազգայնականները հարձակվել են «Ռուսթավի 2»-ի լրագրողների վրա
Հեռուստաեթերում հնչած՝ Հիսուս Քրիստոսին վերաբերող հումորից վրդովված՝ ազգայնական ակտիվիստները պնդել են, որ լրատվամիջոցը վիրավորել է իրենց կրոնական զգացմունքները:
«Հիսուս Քրիստոսը մեծ սխալ է գործել, երբ երկու հազար տարի առաջ եկել է Իսրայել՝ քարոզելու: Նա պետք է մի քանի տարի անց գար Աջարիա, որտեղ նրան չէին խաչի, քանի որ վրացական այդ շրջանում պարզապես ծառ չկա խաչ սարքելու համար»,- «Ռուսթավի 2» հեռուստաընկերության եթերում ասել էր հաղորդավար Գեորգի Գաբունիան՝ ներկայացնելով մի ռեպորտաժ այն մասին, թե ինչպես է «վրաց օլիգարխ Բիձինա Իվանիշվիլին նշված տարածքի ծառերը տեղափոխում իր այգի»:
Խոսքը Վրաստանի նախկին վարչապետ, իշխող կուսակցության փաստացի առաջնորդ Բիձինա Իվանիշվիլիի մասին է, ով վերջին տարիներին քաղաքական դաշտը կառավարելուն զուգահեռ, շատ վրացիների պնդմամբ՝ կառավարում է նաև բնությունը: Իվանիշվիլին իր առանձնատներից մեկի մերձակայքում դենդրոպարկ է կառուցում, որտեղ Վրաստանի տարբեր հատվածներից հսկայական, դարավոր ծառեր են տեղափոխվում և տնկվում:
Մի քանի տասնյակ տոննա կշռող ծառերը տեղափոխվում են հիմնականում ծովային ճանապարհով: «Վրացական երազանքի» առաջնորդի այս հազվագյուտ նախասիրությունը հաճախ է հայտնվում երկրի լրատվամիջոցների ուշադրության կենտրոնում․ ԶԼՄ-ները նշում են, թե Իվանիշվիլին երկրի ենթակառուցվածքները ծառայեցնում է իր ծառասիրությանը:
«Ռուսթավի 2»-ի հեռուստահաղորդավարի հիշյալ սրամտությունից զայրացած՝ «Վրացական քայլերթի» ակտիվիստները հաղորդման հեռարձակումից անմիջապես հետ ներխուժել են հեռուստաընկերության բակ, շրջափակել են Գաբունիայի ավտոմեքենան և հարվածներ հասցնելով մեքենայի ապակիներն, պահանջել ներողություն խնդրել: Բախումների հետևանքով տուժել է հեռուստաընկերության նկարահանող խումբը: Հարձակման մասնակիցներից վեցը ձերբակալվել է:
«Գաբունիան սադրիչ է: Այն, ինչ հնչել է եթերում, վիրավորում է հավատացյալների զգացմունքներն ու Քրիստոսին»,- հայտարարել է ակցիայի մասնակիցներից Սանդրո Բրեգաձեն: Հեռուստաընկերությունը լրագրողների վրա հարձակումը որակել է «խոսքի ազատության ոտնահարում», միևնույն ժամանակ ներողություն խնդրելով Քրիստոսին վերաբերող արտահայտությունների համար:
«Վրացական քայլերթը» վերջին տարիներին պարբերաբար հանրության ուշադրության կենտրոնում է հայտնվում իր ագրեսիվ, հակաարևմտյան կոչերով: Ազգայնական շարժման ակտիվիստները Վրաստանի տարբեր քաղաքներում ակցիաներ են կազմակերպում ապօրինի միգրացիայի դեմ, նաև պահանջում են ձերբակալել նախկին նախագահ Միխեիլ Սաակաշվիլիին: Սակայն, ինչպես նկատում են մի շարք իրավապաշտպաններ, նրանք երբեք չեն անդրադառնում Աբխազիայի և Հարավային Օսիայի խնդիրներին, ինչը շատերին հարկադրում է ենթադրել, որ այդ շարժումը ռուսամետ է, ավելին՝ ֆինանսավորվում է Ռուսաստանից: