Սերժ Սարգսյանն այս պահին իրավունք չունի իր՝ ժամանակին ասած մի խոսքի համար զիջել պաշտոնն ինչ-որ մեկին. Ա. Սարգսյան (տեսանյութ)

Tert.am -ի հետ  զրույցում նախկին ոստիկանապետ Ալիկ Սարգսյանը, կրկին անդրադառնալով իր հայտնի՝ օրորոցում հեղափոխությունը խեղդելու  արտահայտությանը, պատասխանելով հարցին, թե չի վերանայել այն, նշեց.

«Հիմա լավ չեմ հիշում, միգուցե ասել եմ՝ օրորոցում թույլ չեմ տա, օրորոցում կպատժեմ, չեմ թողնի՝ մարդիկ զենքով դուրս գան փողոց: Իսկ ի՞նչ կարծիքի եք՝ ոստիկանապետը ինչ պետք է ասեր: Պիտի ասեի՝ իհարկե, համեցե՛ք, վաղը զինվե՛ք ձեր ավտոմատներով, ականանետներով-ամեն ինչով, դուրս եկեք փողոց, վաղը գնացե՛ք, ռադիոտունը գրավե՛ք, հեռուստատեսությունը…  Դուք էդպիսի՞ պատասխան էիք ինձնից ակնկալում: Իհարկե, ուրիշ պատասխան չունեի:

Ալիկ Սարգսյանն անդրադառնում է նաև իրեն  վերագրվող միջնորդական առաքելությանը, որ, իբր, փորձում է կարգավորել Հովիկ Աբրահամյանի և Նախագահ Սերժ Սարգսյանի հարաբերությունները:

-Պարո՛ն Սարգսյան, իբրև նախկին ոստիկանապետ՝ ինչպե՞ս եք գնահատում հանրապետությունում ստեղծված նախաապրիլյան վիճակը, երբ տարբեր քաղաքական միավորներ, անհատ քաղաքացիներ տարբեր ձևաչափերով հայտարարում են Սերժ Սարգսյանի վարչապետության մասին: Նաև նկատի ունենանք, որ Հայաստանը ԵՄ-ի հետ ստորագրել է համաձայնագիր, որի դրույթների հիմնական մասն ուժի մեջ կմտնի հենց ապրիլին, և որը, կա կարծիք, որ իշխանություններին պետք է որ ստիպի զերծ մնալ կոշտ ուժի կիրառումից:

-Եթե նկատի ունեք ԵՄ-ի հետ նոյեմբերին  կնքած համաձայնագիրը, ապա դրանում չեմ տեսնում կետեր, որոնք վերաբերեն երկրի ներքին ու արտաքին անվտանգությանը, հասարակական կարգի պահպանությանը, և Եվրոպան մեզ ստիպի, որ բարձիթողի վիճակ ստեղծվի:  Նման կետ չեմ տեսել և չեմ կարծում, որ դա պետք է ազդի, որ Ոստիկանությունը թուլացնի իր աշխատանքները: Այսօր Ոստիկանությունը ուժեղ, հզոր կառույց է, ղեկավարվում է կոմպետենտ մարդկանց կողմից, հանձին ոստիկանապետի, և չեմ կարծում, որ Ոստիկանությունը որևէ  բացթողում կունենա, եթե լինեն դրսևորումներ, որոնք կարող են վտանգել հասարակական կարգը կամ այլոց իրավունքները: Վստահ եմ, որ Ոստիկանությունն իր գործողությունները ճիշտ կկատարի, և բռնություն չեմ էլ ակնկալում, որ ոստիկանությունն էլ հատուկ գնա ինչ-ինչ գործողությունների՝ բռնություն կանխելու համար: Մարդիկ եթե ուզում են ինչ-որ բան կազմակերպել՝ միջոցառումներ, ցույցեր, երթեր, իրենց իրավունք է:

-Պարո՛ն Սարգսյան, այս տարիների ընթացքում վերանայե՞լ եք Ձեր հայտնի այն արտահայտությունը, որ «հեղափոխությունն օրորոցում կխեղդեմ»:

-Ինձ երևի համատեքստից դուրս են ընկալել, խոսքը վերաբերել է զենքի միջոցով երկրում հեղաշրջում կատարելուն, որն ասվել է՝ հեղափոխություն: Ես ընդամենը որպես ոստիկանապետ խորհուրդ չեմ տվել, ասել եմ, ավելի ճիշտ հորդորել եմ գնալ քաղաքակիրթ  պայքարի  ճանապարհով՝  երթեր, ցույցեր, միտինգներ, սահմանադրական ճանապարհով՝ ընտրություններ, հանրաքվեներ և այլն, և այլն: Բայց զենքով դուրս գալ փողոց, որ ինչ-որ բան փոխել, խորհուրդ չեմ տալիս: Հիմա լավ չեմ հիշում, միգուցե ասել եմ՝ օրորոցում թույլ չեմ տա, օրորոցում կպատժեմ, չեմ թողնի՝ մարդիկ զենքով դուրս գան փողոց: Իսկ ի՞նչ կարծիքի եք՝ ոստիկանապետն ինչ պետք է ասեր:

Պիտի ասեի՝ իհարկե, համեցե՛ք, վաղը զինվե՛ք ձեր ավտոմատներով, ականանետներով-ամեն ինչով, դո՛ւրս եկեք փողոց, վաղը գնացեք ռադիոտունը գրավեք, հեռուստատեսությունը… Դուք էդպիսի՞ պատասխան էիք՝ ինձնից ակնկալում: Իհարկե, ուրիշ պատասխան չունեի, ես ասել եմ այն, ինչ մտածել եմ և ինչի մասին բազմիցս իմ աշխատակիցներին հրահանգավորել եմ, որ ուշադիր լինեն՝ նման նկրտումներ երկրում չլինեն: Հարկավոր է ի սկզբանե հայտնաբերել և վերացնել: Զենքով իշխանափոխությունը ես հիմա էլ չեմ ընդունում և գտնում եմ, որ ցանկացած հեղափոխություն՝ զենքի միջոցով, երկիրը 40-50 տարով հետ է գցում իր բնականոն ընթացքից: Հիմա էլ եմ այդ կարծիքին: Որևիցե մեկին խորհուրդ չեմ տա նման բան անել:

-Փողոցային պայքարի դուրս գա՞լ որևիցե մեկին խորհուրդ չեք տա:

-Զենքով: Զենքով փողոց դուրս գալու և զենքով հարց լուծելու փորձի: Հիմա էլ խորհուրդ չեմ տալիս, վաղն էլ խորհուրդ չեմ տա:

-Լավ, իսկ ի՞նչ անեն քաղաքացիները, որոնք համաձայն չեն Սերժ Սարգսյանի հնարավոր վարչապետության հետ:

- Դրա համար նախատեսված միջոցներ կան, որոնք ամբողջ աշխարհում ընդունված են: Նոր ասացի՝ հանրահավաք, երթեր, ցույցեր, ընտրություններ, հանրաքվեներ, չգիտեմ, նստացույցեր:  

- «ՀՀԿ» խմբակցությունից բազմաթիվ պատգամավորներ տարբեր առիթներով, բայց Սերժ Սարգսյանի հնարավոր վարչապետության համատեքստում, խոսել են այն մասին, որ նա անփոխարինելի է, և նաև ինքը նման ակնարկ արեց, որ պետք է երիտասարդ կադրեր պատրաստի: Մյուս կողմից, կա կարծիք, որ անփոխարինելի լինում են ծնողներն ու զավակները: Ի՞նչ կասեք այս մասին:

-Կոնկրետ Սերժ Սարգսյանի պարագայում, վերնագիրը չգիտեմ ինչ եք  դնում՝ անփոխարինելի, թե ոչ, բայց որ նա՝ որպես  փորձառու, հմուտ քաղաքական գործիչ, ով ի սկզբանե կանգնած է եղել մեր պետության ակունքներում, և ով իր փորձառությունից, իր անցած ճանապարհից ՝ պատերազմից սկսած մինչև  բոլոր պաշտոնավարումներ, իրավունք ունի իր  կարծիքը հայտնել որպես երկրի ճակատագրով մտահոգ մարդ, և ինքը իրավունք չունի այս պահին իր՝ ժամանակին ասած մի խոսքի համար, թե ժամանակին ասել է՝ չեմ հավակնում և այլն, զիջի այս պաշտոնն ինչ-որ մեկին և համարի, որ այն վստահելի ձեռքերում է, և որ երկիրը չի տարվի լրացուցիչ փորձության, որի իրավունքը մենք չունենք: Ես չեմ գտնում, որ դրանով ինքը հայրենասիրություն կանի կամ ինչ-որ տղամարդկություն կանի: Այսօր բազմաթիվ խնդիրներ ունենք, ես կոնկրետ Սերժ Սարգսյանին եմ տեսնում մեր խնդիրները լուծելու գագաթին: Դա իմ սեփական կարծիքն է: Որպես հայ մարդ՝ թողե՛ք՝ ես այդպես էլ մնամ իմ կարծիքին:

-Ճի՞շտ է, որ մամուլում, նաև Արարատի մարզի բնակիչների շրջանում բազմաթիվ տեղեկություններ կան, որ Դուք ինչ -ինչ միջնորդական առաքելություն եք իրականացնում ԱԺ նախկին նախագահ, նախկին վարչապետ Հովիկ Աբրահամյանի համար՝ նրա համար բարեխոսելով նախագահականում: Մարդ, ում հետ Ձեր հարաբերությունները նախկինում,  ըստ մամուլի, լարված էին:

-Նույնիսկ ծիծաղելի է այդ մասին խոսելը: Ցավով, բայց տեղեկացնում եմ՝ ես չունեմ այսօր այդ դիրքը և այդ կարևոր դերակատարությունը, որ փորձեմ միջնորդ դառնալ նախկին վարչապետի և Նախագահի միջև: Եվ նման բան չի կարող լինել: Մոտակա տարիներին գոնե:

-Իսկ իր հետ հանդիպո՞ւմ եք:

-Ընդհանրապես չեմ հանդիպել արդեն, երևի թե, մի քանի տարի: Նույնիսկ հարսանիքների ու հուղարկավորությունների ժամանակ: Պատահմամբ գոնե իրար չենք տեսել, որ գոնե միմյանց բարևեինք: Ես իմ գործերով եմ զբաղված, մարդը՝ իր: Եվ առիթ էլ չկա, ես իրեն պետք էլ չեմ, որ տեսնի ինձ կամ չտեսնի: Այդպիսի խնդիր էլ չկա: Նա ինձ դիմելու որևիցե բան չունի: Նա ինքն իր հարաբերություններն ունի Ձեր նշած բոլոր մարդկանց հետ, ում էլ ուզի, կարող է տեսնել:, այնպես որ նա միջնորդի կարիք, չեմ կարծում, որ այսօր ունի: