«Ծառուկյան» խմբակցությունը առաջարկում է փոփոխել ընտրական օրենսգիրքը, ԱԺ փոխնախագահն էլ հիշեցնում է ՝ այն ընդունվել է քաղաքական մեծ կոնսենսուսի արդյունքում. Քննարկում ԱԺ Պետաիրավական հանձնաժողովում
ՀՀ ԱԺ պետաիրավական հարցերի հանձնաժողովի նիստում մեկնարկել է ԱԺ «Ծառուկյան» խմբակցության պատգամավորների հեղինակած ընտրական օրենսգրքում փոփոխություններ կատարելու մասին նախագծի քննարկումը:
Նրանք փոփոխությամբ առաջարկում են վերացնել ռեյտինգային ընտրակարգը:
Հարցով հարակից զեկուցող, ԱԺ փոխնախագահ Արփինե Հովհաննիսյանը նշեց, որ այս փուլում այսպիսի փոփոխությանը դեմ է՝պայմանավորված նախկինում ձեռք բերված քաղաքական կոնսենսուսով, որով և ընդունվեց գործող ընտրական օրենսգիրքը:
«Եղել են մի քանի պահանջներ, կոնսենսուսի արդյունքում որոշ պահանջներ ընդունվել են, որոշ պահանջներ՝ ոչ: Սա մեր ընտրական օրենսգրքի ընդունման ժամանակ ամենակարևոր առանձնահատկություններից մեկն է եղել, և նույն այն ժամանակ ԲՀԿ-ն, կոնսեսուսի արդյունքում, կողմ է քվեարկել ընտրական օրենսգրքին: Հասկանում եմ տիկին Զոհրաբյանի փաստարկը, որ հետո հասկացել են, որ դրա անհրաժեշտությունը չկա, բայց, քանի որ սա եղել է քաղաքական կոնսեսուսի արդյունք և հետևանք»,-ասաց Հովհաննիսյանը:
Նա նշեց, որ իր դեմ քվեարկությունը հիմնավորելու է հենց մեծ քաղաքական կոնսենսուսով, որ ձեռք է բերվել ընդդիմության հետ միասին՝ Ընտրական օրենսգիրքն ընդունելու ժամանակ:
«Ես իմ դեմ քվեարկությունը փորձում եմ հիմնավորել, որ մեծ քաղաքական կոնսենսուսով կայացված որոշումը մենք չենք կարող այսպես միանգամից փոխել, այստեղ կրկին անհրաժեշտ են քննարկումներ, դեբատներ, կոնսեսուսի կայացում, ես դրա համար առաջարկելու եմ հանձնաժողովին տալ բացասական եզրակացություն՝ բովանդակային քննարկման մեջ ներքաշվելու ցանկություն չունենալով»,-ասաց Հովհաննիսյանը:
«Ծառուկյան» խմբակցության պատգամավոր Նաիրա Զոհրաբյանն արձագանքեց քաղաքական կոնսենսուսի մասին հիշեցմանը՝ նշելով, որ եղել է փոխզիջումային տարբերակ:
«ՀՀԿ-ն պնդում էր, որ եթե մենք չհամաձայնենք այս վարկանիշային տարածքային ցուցակին, ապա իրենք չեն համաձայնվելու ընդդիմության համար անչափ կարևոր երկու լրջագույն սկզբունքներին, այն է ՝տեսանկարահանմանը, և ցուցակների հրապարակմանը: Այս դահլիճում քանիցս եղել է քննարկում, պարոն Թովմասյանը կվկայի, որ թե՛ ԲՀԿ-ի, թե՛ այն ժամանակ ՕԵԿ-ի կողմից առաջարկվել է, անընդհատ մտահոգություն է եղել տարածքայինի հետ կապված, բայց պարոն Հարությունյանը հանդես եկավ բացահայտ ուլտիմատումով՝ ասելով, որ եթե այս տարբերակը չի ընդունվում, ապա ընդդիմության համար սկզբունքային երկու պահանջները՝ տեսանկարահանումն ու ընտրացուցակների հրապարակումը ևս չի ընդունվում»,-ասաց Զոհրաբյանը:
Նա նշեց, որ եթե ընտրական օրենսգրքի կիրարկման ընթացքում չտեսնեին թերությունները, ապա օրենքներում փոփոխություններ կատարելու անհրաժեշտություն չէին տեսնի:
«Կիրարկումը ցույց տվեց, որ այս մոդելը մեր քաղաքական մշակույթում ուղղակիորեն չի աշխատում»,-ասաց Զոհրաբյանը:
Ի պատասխան Զոհրաբյանի հնչեցրած կարծիքի՝ Արփինե Հովհանիսյանը արձագանքեց. «Որևէ քաղաքական ուժի կողմից ուլտիմատում չի եղել իշխող ուժի որևէ քաղաքական գործչի կամ ներկայացուցչի կողմից: Շատ ճիշտ նշեցիք, փոխզիջումային տարբերակ է եղել, կոնսենսուսը ինքնին նշանակում է փոխզիջում, սա նշանակում է , որ ներկայացված 5 պահանջներից, փոխադարձ համաձայնությամբ մեկը չի ընդունվել, մյուս չորսի վերաբերյալ եղել է առաջարկ, որին մենք համաձայնել ենք: Դա նշանակում է կոնսեսուս, փոխզիջում, ոչ թե ուլտիմատում»,-ասաց Հովհաննիսյանը:
Աժ Հայաստանի հանրապետական կուսակցություն խմբակցության պատգամավոր Գևորգ Կոստանյանը հարակից զեկուցողին հարցրեց՝ ինչո՞ւ այսքան կարճ ժամկետում կոնսեսուսով ընդունված օրենքը փոխելու անհրաժեշտություն առաջացավ:
«Արդյոք մեր ընդդիմադիր գործընկերները կողմ էին քվեարկվել այս օրենքին, երկրորդ՝ արդյոք կարող ենք փաստել, որ այո, քանի որ կողմ եք քվեարկել, այս օրենքի փոփոխման անհրաժեշտությունը բացառապես պայմանավորված է ընտրության արդյունքներով, որը ձեզ, երևի թե, չի բավականացրել»,-ասաց Կոստանյանը՝ հավելելով, որ խոսքը ընտրական գործընթացների կամ համակարգի վատ կամ լավ լինելու մասին չէ, այլ այն մասին, որ գործածության արդյունքում ընտրական օրենսգիրքը տվյալ քաղաքական ուժին չի տվել ցանկալի արդյունք, հետևաբար լավը չէ:
Տեղից միջամտեց Նաիրա Զոհրաբյանն ՝ասելով, որ ինչպես կարող է այդ հարցին պատասխանել Արփինե Հովհաննիսյանը, եթե հարցն ուղղված է ԲՀԿ-ին։
«Ես եմ որոշում՝ ում հարցը տալ»,- ասաց Կոստանյանը:
«Չէ բայց դուք ասում եք, արդյոք ԲՀԿ-ին չի բավարարել, Արփինե Հովհաննիսյանը ի՞նչ գիտի մեր քաղաքական որոշման կոնտենտը»,-պատասխանվեց Զոհրաբյանը:
Նիստը վարող հորդորեց Զոհրաբյանին դիտարկումներն անել ավելի ուշ՝ եզրափակիչ ելույթի տեսքով:
Արփինե Հովհաննիսյանն էլ վերադառնալով Կոստանյանի հարցին, նշեց, որ ԲՀԿ-ն կողմ է քվեարկել, և վերահաստատեց իր մոտեցումը հարցի շուրջ: