یوه روسۍ الوتکه د یوې امریکایي الوتکې مخ ته ډېره نږدې تېره شوې
د امریکا د بهرنیو چارو وزارت تېره شپه ناوخته په یوه بیان کې پر روسیې غږ وکړ چې دا ډول ناامنه اقدامات چې د ناسمې محاسبې امکان پهکې شته، د دواړو خواوو پیلوټان له خطر سره مخامخ کوي او په فضا کې د الوتکو د ټکر باعث کېدای شي، بند کړي.
پرون له دې مخکې د امریکا سمندري ځواکونو وویل چې د تورې بحیرې پر سر په نړیوال فضايي قلمرو کې د امریکا یوې کشفي الوتکې خپل مأموریت نیمګړی پرېښود.
د روسیې دفاع وزارت په یوه خبرپاڼه کې ویلي چې د روسیې سو ۲۷ جټ الوتکې امریکایۍ الوتکه وپېژندله.
په خبرپاڼه کې ویل شوي چې روسیې د پېښې پر مهال ټول احتیاطي تدابیر نیولي وو، خو د امریکا سمندري ځواک ویلي چې روسۍ الوتکې باید د پېښو د مخنیوي او مصونيت د یقیني کولو لپاره د نړیوالو معیارونو په چوکاټ کې دننه چال چلند وکړي.