Aqyardaki kommunistke Oktâbr inqilâbı kününde ötkergen miting içün cöremelerini lâğu ettiler
Bunı Qırım.Aqiqat muhbirine Parhomenkonıñ vekilleri söyledi, çünki bu cöremeler boyunca mahkeme oturışuvları qapalı rejimde ötkerildi. Olarnıñ malümatına köre, daa keçken yılnıñ noyabrinde Parhomenkodan bütün qabatlavlar, şu cümleden «izinsiz miting» boyunca qabaatlav da alıp taşlandı.
Kommunist özü, «asıl da, başqa türlü olmaq mümkün degil edi», dedi.
Noyabrniñ 7-sinde Aqyarda Oktâbr inqilâbınıñ 100 yıllığına bağışlanğan mitingge 500-den ziyade kişi çıqtı.
Noyabrde Aqyardaki Lenin rayonı mahkemesi, Rusiye polis memurına boysunmağanı içün Parhomenkoğa 500 ruble (231 hrivna – QA) miqdarında cöreme tayin etti. Daa soñra mahkeme izinsiz mitingniñ ötkerilmesi içün kommunistniñ cezalandırılmasına dair daa bir qarar çıqardı. Oña 30 biñ ruble (13,8 biñ hrivna – QA) miqdarında cöreme tayin etildi.
Daa evel Parhomenko, Büyük terror devrindeki SSCB rehberi İosif Stalinniñ doğğanına 138 yıl toluvı munasebetinen çıqış yapqanda, oña «Stalinni ve onıñ qattı qolunı qaytarmaq» isteklernen kettikçe daa sıq muracaat etkenlerini bildirdi.
Rusiye imperiyasında «Oktâbr inqilâbı» denilgen bolşeviklerniñ devrimi 1917 senesiniñ oktâbrinde (yañı üslüp boyunca – noybrinde) yapıldı. Devrimniñ neticesinde Rusiyede Grajdan cenki başlandı, Muvaqqat akimiyet devrildi ve bolşevikler akimiyetke keldi.