Մեղադրողի ու դատարանի դերը խառնում եք, հուշում եք վկաներին. Անդրիաս Ղուկասյանի պաշտպանը՝ դատավորին
Էրեբունի և Նուբարաշեն վարչական շրջանների ընդհանուր իրավասության դատարանում շարունակվում է «Ոտքի՛ Հայաստան» քաղաքացիական նախաձեռնության համակարգող Անդրիաս Ղուկասյանի դատաքննությունը՝ դատավոր Վարդան Գրիգորյանի նախագահությամբ:
Այսօրվա դատական նիստի մեկնարկին ամբաստանյալի պաշտպան Կարեն Մեժլումյանը հանդես եկավ հայտարարությամբ, որը, պաշտպանի խոսքով՝ վերաբերում էր նախագահող դատավորի ապօրինի և պաշտպանական իրավունքը խախտող գործողություններին:
Պաշտպանն ասաց, որ դատավորը թույլ է տվել գործողություններ, որն ընդգծված բացասական վերաբերմունք է ամբաստանյալի նկատմամբ:
«Դուք թույլ չեք տալիս մեղադրանքի էության խեղաթյուրման բացահայտումը: Արգելում եք հրապարակել ցուցմունքների էական հակասությունները, ինչպես նախկինում մի քանի անգամ դատապարտված, «պարանոյա» հիվանդությամբ տառապող առանցքային վկա Գեղամ Սահակյանի ցուցմունքի հակասություններն են: Նա առանցքային վկան է, որի ցուցմունքների վրա կառուցված է մեղադրանքը»,-ասաց պաշտպանը:
Անդրադառնալով մյուս վկայի՝ Արտակ Մկրտչյանի ցուցմունքին՝ Մեժլումյանը նշեց, որ նա գողություն կատարելու համար 3 անգամ դատապարտված է եղել, հաշվառված է հոգեբուժարանում և խրոնիկ ալկոհոլամոլ է. «Նա մեղադրող կողմի վկան է, հետևաբար նրան առաջինը պետք է հարցաքններ մեղադրողը, սակայն խախտելով օրենքը` հարցաքննեցիք Դուք և հուշող հարցեր տվեցիք: Օրինակ, երբ վկան Ազատության հրապարակի մասին ոչինչ իր ցուցմունքում չասաց, Դուք հուշող հարց տվեցիք, թե արդյո՞ք վկան այդ տարածքում մասնակցել է հանրահավաքի, թե ոչ: Սա միակ հուշող հարցը չէր»,-ասաց Մեժլումյանը:
Մեժլումյանը նկատեց, որ դատարանը մերժում է Արտակ Մկրտչյանի և Գեղամ Սահակյանի նախաքննության և դատաքննական ցուցմունքների հակասությունները:
Փաստաբանի խոսքով՝ այդ կերպ դատավորն իրեն ազատում է նախաքննական ցուցմունքները գնահատելու և հակասություններին անդրադառնալու հնարավորությունից, ցուցմունքներում սուտը բացահայտելուց:
«Մեղադրողի ու դատարանի դերը խառում եք, հուշում եք վկաներին, մեր նկատմամբ թույլ եք տալիս էթիկայի կանոնների խախտումներ, ինչը նշանակում է, որ Անդրիաս Ղուկասյանը դեռ երկար կմնա մեկուսարանում: Դուք արդար դատաքննություն չեք կարող իրականացնել»,-ասաց Մեժլումյանը:
Հայտարարությանն արձագանքեց մեղադրող դատախազ Պետրոս Պետրոսյանը, ով պաշտպանական կողմի հայտարարությունը որակեց օբյեկտիվ իրականության հետ որևէ աղերս չունեցող հայտարարություն:
Ինչ վերաբերում է վկաների ցուցմունքների հակասություններին, դատախազն ասաց, որ դատարանում կատարված իրադարձությունները պարզ են և դրանից ակնհայտ է, որ ցուցմունքներում էական հակասություններ չկան:
«Էական հակասությունների առկայության պայմաններում օրենքի պահանջն է քննության առարկա դարձնել հակասությունները, դրանք էական հակասություններ չեն եղել: Անպատասխանատու հայտարարությունն հնչեցելը կոռեկտ չէ»,-ասաց Պետրոսյանը:
Դատական նիստը շարունակվում է:
Հիշեցնենք, որ Ղուկասյանին մեղադրանք է առաջադրվել 2016թ. հուլիսի 29-ին Երևան քաղաքում զանգվածային անկարգություններ կազմակերպելու, հուլիսյան դեպքերի ժամանակ Մ. Խորենացի փողոցում ՀՀ ՊՊԾ գնդի տարածքում գտնվող շենքերը, շինությունները և տրանսպորտային միջոցները զավթած, ոստիկաններ և բուժաշխատակիցներ պատանդ վերցրած կազմակերպված զինված խմբին միանալու փորձի, ինչպես նաև «զինվելու, ապօրինի կերպով հրազեն ու ռազմամթերք կրելու, պահելու և խմբի անդամների հետ համակատարմամբ զավթած ու պատանդներին պահելու փորձերի մեջ», սակայն հանցագործություններն ավարտին չի հասցրել իր կամքից անկախ հանգամանքներով:
Ըստ մեղադրանքի՝ Անդրիաս Ղուկասյանի գործողություններից տուժել է 36 անձ: Նրան մեղադրանք է առաջադրվել ՀՀ ՔՕ-ի 225-րդ հոդվածի 1-ին մասի, 34-219-րդ հոդվածի 3-րդ մասի 1-ին կետի, 34-218-րդ հոդվածի 3-րդ մասի 1-ին կետի, 34-235-րդ հոդվածի 3-րդ մասի հատկանիշներով: