АСАБИКВА РХЪВМАРЫРТА
Сентябрь а 7 Черкесск город, Гутякулова урам апны уыжвгIанчIви спортплощадкIа гIахъыртIытI. Радонежский Сергий йкьльиса адзхъа йгIаншаз аспортплощадкIа Черкесск город абюджет йгIаунащтыз ахчала йыруыхватI. Ауи ангIахъыртIуаз агород ахъада Беланов Евгений йгIайззаз драйхIвахIвтI.
– Агород ари ахIабльа апны асабиква рыхъазла спортплощадкIа уыхварала абзазагIвчва ртшазынархара хIырхъйатI. ЙхIазырхаз ауыжвгIанчIви спортплощадкIа абар уахьчIва йгIахъхIтIитI. Ауи йапшым аспорт квпшыраква йрыквыргIапспI, асабиква йшыргвапхуш апшта йыруыхватI. ЙгIазрысабапуаш асабиква афизкультури аспорти йрыдкIылата, йызгIвадата йгIадзынгылыргIатI,–йхIватI Беланов Евгений.
АспортплощадкIа ангIахъыртIы Черкесск город йгIвбахауа асаби спорт апхьарта афутболасыгIвчва атопасра джвыквырцIатI. Ари атшын дугьи хвыцгьи аспортплощадкIа йайгвыргъьун.