Зәмирә-Камилә Гыйззәтуллиналарның хәйрия концерты: «Зәмирә бик көтте, сорады...»

Татар эстрадасы җырчыларының моңлы булудан тыш, киң күңеллелекләре, мәрхәмәтлелекләре куандыра. Балаларның күңелләрен күреп, алар белән дуэтлар җырлаулары, терәк булулары зур хөрмәт уята. Зәмирә һәм Камилә Гыйззәтуллиналарның концерты да шундыйлардан булды. Җылы карашлар, җанлы аралашулар, елмаюлар белән тулды.

Казанда яшәүчу игезәк кызлар Камилә һәм Зәмирә Гыйззәтуллиналарга 9 гыйнварда 16 яшь тулды. Аларның икесе дә тумыштан ДЦП диагнозы белән авырый. Зәмирә игезәге Камиләдән аермалы буларак, үз аягында йөри, сөйләшә, хәтта җырлый да әле. Ә Камилә урын-җирдә ята. Күптән түгел «Интертат» кызларның тарихы белән таныштырган иде.

• «Салават абый, сезнең белән җырласам ярыймы?»

«Зәмирә мине әлеге концертка чакыргач, бик теләп ризалаштым»

Бу концертка баруым залга кереп концерт караудан түгел, ә сәхнә артында җырчылар белән аралашудан башланды. Зәмирә аларның барысы белән дә елмаеп сөйләште, шунда ук җырлап та алды әле.

Иң беренче Зәмирә һәм Камиләнең әнисе Дания Гыйззәтуллина белән сөйләштем.

Әлеге концертка без озак, ике еллап килдек. Зәмирә бу концертны бик сорады, көтте, аның игезәге Камиләгә ярдәм итәсе килде. Беренче хәйрия концерты июньдә булды, менә ярты елдан без кабат җыелдык. Татар эстрадасы җырчылары белән элемтәдә тордык, күпләре безгә ярдәм итәргә әзер иде. Бу концертны оештыруга иң зур өлешен «Хыял» продюсерлык үзәге, Салават Фәтхетдиновның хәйрия фонды һәм ул шәхсән үзе кертте. Безгә ярдәм итүләре өчен без аларга чиксез рәхмәтле, – диде әни кеше.

Аннары сәхнә артындагы кайбер җырчылар белән дә аралашып алдым.

Алина Давыдова: «Мондый хәйрия концертларында мин еш чыгыш ясарга тырышам. Аллаһка шөкер, бүген бик әйбәт состав, биредә күп җырчылар чыгыш ясаячак. Бүген Зәмирә белән «Ялгышу» дигән җырымны җырлыячакбыз. Зәмирә бик талантлы кыз. Ул бу җырны бик рәхәтләнеп башкара, һәм аның бу җыр чыннан да яхшы килеп чыга».

Альберт Вәлиуллин: «Хәйрия концертларында катнашырга һәрвакыт ризамын. Мине чакырсалар, килергә тырышам. Салават абый мондый концертларны ел да оештыра, аңа зур рәхмәт моның өчен. Бу – бик зур эш. Аның кебек кешеләр, хәйриячеләр күбрәк булса, тагын да яхшырак булыр иде».

Алинә Сәфиуллина: «Зәмирә турында интернеттан күргәнем бар. Минем белән элемтәгә аның әнисе Дания чыкты, «Зәмирәнең сезнең белән «Юк, кирәкми» җырын башкарасы килә», - диде. Мин бик рәхәтләнеп риза булдым, чөнки хәйрия концертларына күп йөргәнем бар. Бездән хәйрия, ярдәм булсын, дим. Зәмирә – бик тырыш кыз, күп җырлар өйрәнгән, дуэтлар башкарачак бүген. Бүген Зәмирә сольный концерт куйган кебек, сәхнәдән керми дә. Шаккатып торам, ничек ятлап бетергәндер шул кадәр җырны».

Альбина Апанаева: «Бу – Зәмирәнең икенче концерты. Бүген минем репертуарымнан ул сайлап алган «Чын дустым» җырын башкарабыз. Чыгышыбызны кабатларга Зәмирә студиябезгә килгән иде. Аны бергәләшеп өйрәндек. Бүген бик матур тамаша, Зәмирәгә чакыруы өчен рәхмәт. Аңа зур уңышлар, молодец ул!»

Рината Тэй: «Хәйрия концертларында беренче чыгышым гына түгел. Мондый концертларда еш чыгыш ясарга тырышам, ни өчен дигәндә, тормышта төрле хәлләр була. Мин үзем дә шундый ук хәл белән гаиләмдә күзгә-күз караштым. Үземә дә шушындый хәйрия концерты ясарга туры килде. Аны оештыру өчен күпме көч кертелгәнен, ни өчен ясалганын бик әйбәт беләм. Хәйрия концертында катнашучы коллегаларыма ярдәм куллары сузганнары өчен бик рәхмәтле. Зәмирә мине әлеге концертка чакыргач, мин бик теләп ризалаштым. Бүген без «Югалма» җырымны башкарачакбыз. Аны Зәмирә үзе сайлап алды. Әнисе дә юл ярып бара торган көчле ханым, миңа да киңәш биреп куя, шул арада Зәмирәне дә карап өлгерә. Исән-сау гына булсыннар, уңышлар аларга. Шушы эшләгән эшләрнең әҗере булсын».

Мин залга чыгып утырганда, концерт башланып киткән иде инде. Тулы зал Зәмирәне җылы алкышлар белән каршы алып торды.

Шунысы кызык, татар эстрадасында һәр чыгыш саен күлмәк алыштурчы бер җырчы – Илсөя Бәдретдинованы беләбез. Хәзер аңа «алмаш», шулай ук матур костюмнарын бик еш алыштыра торган Зәмирә үсеп килә. Кем белән җырлый, шуның образына туры китереп киенә. Чын кыз, «модница» инде.

Әлеге концертны оештыруга Салават абыйның зур өлеш кертүен Дания Гыйззәтуллина әйтеп китте инде. Үзе дә катнашты бит! Бөтен кеше белгән, популяр «Салкын чәй», «Уфтанма» җырларын башкарды. Аның театрында эшләүче вокалист кызлары да соло чыгыш ясады. Менә төркем ичмасам, бергә игелек тә эшлиләр.

Концерт программасы шундый кызыклы иде ки, беренче өлештә хәтта дирижер Ильяс Камал җитәкчелегендә «La Primavera» оркестры да катнашты. Вадим Захаров, Зәринә Асылкаева, Радик Яруллин, Дилә Нигъмәтуллина, Рәзил Исмәгыйлев, Марат Гәлимов һәм башкалар. Артистлар исемлеген язып та бетереп булмый.

Концертның кульминацион мизгеле – Ильвинаның Зәмирәгә бүләк тапшыруы булды. Ул аңа композитор Гүзәлиядә җыр яздырырга, һәм видеоклип төшерергә сертификат бүләк итте. Зәмирәнең ничек балкуын күрсәгез! Тиздән телеэкраннарда аның үзенең җырын, клибын да күрербез, Аллаһы боерса. Ә Ильвинага баланың күңелен күргәне өчен зур рәхмәт. Үзенә дә уңышлар юлдаш булсын.

Гомумән, мондый концертларда катнашкан һәр артистка эшләгән игелекләре меңе белән әйләнеп кайтсын. Алар өчен чыгып җырлауның бер авырлыгы юк кебек. Тик шул ук вакытта алар җырлаулары белән гаиләгә олы ярдәм күрсәтәләр, баланың күңелен күрәләр.

Артистларга гына түгел, килгән тамашачыларга да рәхмәт. Концертның никадәр уңышлы үтүе алардан тора бит. Акчаларын жәлләмичә, кызларга булышабыз, дип килгәннәр, шуңа өстәп үзләре дә рәхәтләнеп ял итеп кайтып китәләр.