Гвардиола: «Манчестер Сити» яримфиналга чиқиб тарих ёзиш арафасида

Бугун, 4 апрель куни Англия Кубоги чорак финали доирасида катта қизиқиш уйғотаётган тўқнашув бўлиб ўтади. Унда «Манчестер Сити» ўз майдонида принципиал рақиб «Ливерпул»ни қабул қилади. Бу беллашув нафақат турнир нуқтаи назаридан, балки икки грандиоз жамоа ўртасидаги рақобат сабаб ҳам мухлислар диққат марказида.

«Шаҳарликлар» бош мураббийи Хосеп Гвардиола ушбу муҳим ўйин олдидан ўз фикрлари билан ўртоқлашди. Испаниялик мутахассис жамоасининг сўнгги вақтлардаги барқарор ўйини ва юқори натижаларини алоҳида таъкидлаб ўтди. Унинг таъкидлашича, «Манчестер Сити» ҳозир тарихий ютуқ ёқасида турибди.

— Бизда яна бир муҳим маррага етиш имконияти бор. Агар бугун ғалаба қозонсак, кетма-кет саккизинчи марта ярим финалга чиқамиз. Бу эса ҳали ҳеч бир жамоага насиб этмаган натижа. Бу турнир жуда нуфузли ва биз учун катта аҳамиятга эга. Рақиб ҳам кучли, лекин мухлисларимиз қўллаб-қувватласа, бу вазифани бажара оламиз, — дея ишонч билдирди Гвардиола.

Дарҳақиқат, «Манчестер Сити» сўнгги йилларда Англия футболида барқарорлик ва юқори савия тимсолига айланди. Жамоа Премьер-лигада ҳам юқори ўринлар учун курашни давом эттирмоқда. Айни дамда «шаҳарликлар» турнир жадвалида иккинчи поғонани эгаллаб, пешқадам «Арсенал»дан 9 очкога орқада бормоқда.

Шу билан бирга, «Ливерпул» ҳам ҳар қандай рақибга жиддий муаммо туғдира оладиган жамоалардан бири ҳисобланади. Улар айрим қийинчиликларга дуч келаётган бўлса-да, ҳужум чизиғидаги салоҳияти ҳали ҳам хавфли ва самарали.

Қисқаси, бугунги баҳс ҳақиқий футбол шоуга айланиши кутилмоқда. Бир томонда — тарихий рекорд сари интилаётган «Манчестер Сити», иккинчи томонда — ҳар қандай рақибни тўхтатишга қодир «Ливерпул».

Энди асосий савол: Гвардиола шогирдлари яна бир саҳифани ёза оладими ёки мерсисайдликлар сенсация қиладими? Бир нарса аниқ — бу ўйинни ўтказиб юбориш, ростини айтсам, футболга хиёнатга тенг.