Гвардиола тан олди: натижа оғир, аммо чорак финалга чиқишга умид бор

“Манчестер Сити” бош мураббийи Пеп Гвардиола “Реал”га қарши учрашувдан кейин матбуот олдида жамоанинг бошланғич таркиби, ўйин режаси ва 0:3 ҳисобидаги мағлубият сабаблари ҳақида атрофлича фикр билдирди. Испаниялик мутахассиснинг сўзларидан бир нарса аниқ сезилди: ўйин мазмунига у тўлиқ норози эмас, аммо натижа қаттиқ “урди” ва жавоб баҳси олдидан имкониятлар анча чекланганини ҳам яширмади.

“Катта ўзгариш бўлмади”

Гвардиола аввало старт таркиби ҳақидаги саволларга жавоб қайтарди. Унинг таъкидлашича, бу сафар унчалик катта ўзгаришлар қилинмаган. “Ньюкасл”га қарши баҳсда ротация кўпроқ бўлган, бу ўйинда эса сўнгги турларда майдонга тушиб келаётган футболчиларнинг аксарияти яна ишонч олган.

"Йўқ, унчалик катта ўзгаришлар бўлмади. “Ньюкасл”га қарши ўйинда ўзгаришлар кўпроқ эди. Сўнгги учрашувларда бу футболчиларнинг аксарияти майдонга тушган.", - деди Гвардиола.

Режа қанотлар орқали босим қилиш эди

Пепнинг айтишича, у бу ўйинда қанотлардан агрессив фойдаланишни истаган, айниқса яккама-якка вазиятларда. У Жереми Докунинг ўйинини алоҳида мақтади: Доку жуда хавфли бўлгани, бир неча бор қанотдан “кесиб кириб”, дарвоза чизиғигача етиб боргани айтилди. Бироқ ўнг қанотда “Сити” бироз қийналган. Шунинг учун орқага очилиб ҳаракат қилишни Антуан Семеньо ва Нико О’Райли орқали амалга оширишга уринганини қайд этди.

"Мен қанотлар орқали агрессив ўйнашни истадим, айниқса яккама-якка вазиятларда. Жереми Доку жуда ажойиб ўйнади. Ўнг қанотда эса бироз қийналдик. Орқага очилиб ҳаракат қилишга уриндик ва буни Антуан Семеньо ҳамда Нико О’Райли билан амалга оширдик.", - деди Гвардиола.

Гвардиолага кўра, жамоа ҳужумга чиқди, гол излади, ўйинни “очиб” кўришга ҳаракат қилди. Аммо биринчи бўлимда “Реал” учта гол урди — айнан шу ерда учрашувнинг асосий бурилиши бўлди.

“Биз охиригача бордик, лекин зарбани беролмадик”

Мураббий бир жиҳатни оғриқ билан тилга олди: “Сити” ҳужумнинг охирги қисмигача жуда кўп борган — бу ҳатто орзудек, деди у. Бироқ энг муҳим нуқта етишмади: ҳал қилувчи зарба, охирги қарор, Куртуани жиддий сейвга мажбур қиладиган аниқ зарба.

Унинг таъкидлашича, “Реал” биринчи голдан кейин кўп имконият яратмаган, аммо ҳар келганда самара кўрсатган: иккинчи келиш — иккинчи гол, учинчи келиш — учинчи гол. Пеп буни “жуда қийин” деб атади ва рақиб сифати ҳамда самарадорлигини юқори баҳолади.

Шу билан бирга, у “Реал” кейинчалик тактикани ҳам ўзгартирганини айтди: ҳимояда беш нафар билан ўйнаб, марказни зич қилиб қўйишган, барча 11 футболчи ҳимояга қайтган. Бундай вазиятда қарши ҳужумлар доим хавфли бўлишини у алоҳида таъкидлади.

"Биз кўп марта ҳужумга чиқдик, гол уришни истадик. Аммо улар биринчи бўлимда уч марта имкониятга эга бўлиб, учта гол урди. Биз эса ҳужумнинг охирги қисмигача жуда кўп бордик. Шунинг учун улар тактикани ўзгартириб, ҳимояда беш нафар футболчи билан ўйнай бошлашди ва марказни жуда зич қилиб қўйишди.", - деди Гвардиола.

Чорак финал ҳақида: “Имконият катта эмас, лекин ҳаракат қиламиз”

Гвардиола жамоанинг кейинги босқичга чиқиш имкониятини реал баҳолади: ҳозирча имконият катта эмас. Аммо у барибир курашдан воз кечмасликларини айтди: “ҳаракат қиламиз”, деган.

"Менимча, ўйин ёмон эмасди, анча яхши ўтди. Жереми Докунинг якка ҳаракатлари орқали қанча марта дарвоза чизиғигача етиб борганимизни билмайман. Узун узатмалар ва иккинчи тўпларда, айниқса Антуан Семеньо ва Нико О’Райли орқали ҳам кўп имкониятлар яратдик. Жарима майдони ичида уч-тўрт футболчимиз турган вазиятлар бўлди, лекин ҳатто Тибо Куртуага бирорта жиддий сейв қилиш имконини ҳам беролмадик."

Энди тикланиш ва кейинги ўйинлар

Пепнинг сўзларига кўра, ҳозир жамоа учун энг муҳим иш — руҳий ва жисмоний тикланиш. Чунки олдинда Лондонда “Вест Хэм”га қарши учрашув бор, Премьер-лигада ҳам кураш ҳали тугамаган. Кейин эса “Этихад”да жавоб баҳси.

У мухлислар “Этихад”ни тўлдиришини, футболда эса ҳеч қачон ҳамма нарса олдиндан аниқ бўлмаслигини айтди: балки жамоа бирор ечим топар, балки рақибга қарши тўғри йўлни топар.

"Ҳозир энг муҳими — бироз руҳий ва жисмоний тикланиш. Кейин Лондонда "Вест Хэм"га қарши ўйин бор, бу ҳам осон бўлмайди. Премьер-лигада эса ҳали курашда қолмоқдамиз.

Шундан кейин нима бўлишини кўрамиз. Мухлисларимиз албатта “Этихад”га келишади. Футболда эса ҳеч қачон олдиндан аниқ айтиб бўлмайди — балки биз бирор ечим топармиз ёки уларга қарши қандай ўйнаш кераклигини тўғри англармиз".

“3:0 — 4:0дан яхшироқ, лекин барибир оғир”

Гвардиола қаттиқ ва рост гапни ҳам айтди: 3:0 ҳисобидаги мағлубият 4:0дан яхшироқ, лекин бу барибир оғир натижа, бундан қочиб бўлмайди. Унинг умумий хулосаси шундай бўлди: ўйин мазмун жиҳатдан натижадан кўра яхшироқ кўринди, аммо ҳисоб — айнан шу.

Қисқаси, Пеп ўйиндаги баъзи ижобий жиҳатларни кўрди: қанотдан киришлар, иккинчи тўплар, жарима майдонига кириб боришлар. Лекин “Реал”нинг самарадорлиги ва “Сити”нинг охирги зарбадаги муаммоси натижани кескин қилиб қўйди. Энди эса бир ҳафта вақт бор — ва “Этихад”да навбатдаги катта кеча.