«Болонья» сўнгги дақиқада гол урди, «Фиорентина» йирик ҳисобда ютқазди
Италия чемпионатининг 27-туридан ўрин олган сўнгги икки учрашув мухлисларга турлича кайфият улашди. Бир томонда «Болонья» сафарда жуда муҳим ғалабани илиб кетди, иккинчи томонда эса «Фиорентина» яна оғир зарба қабул қилиб, ўз ишқибозларини ранжитди.
«Болонья» бу сафар аутсайдерлардан бири бўлиб турган «Пиза» майдонига сафар қилди ва осон кечмаган баҳсда минимал ҳисобда зафар қозонди. Учрашув узоқ вақт дуранг сари кетаётгандек кўринган эди, бироқ 90-дақиқага келиб Йенс Одгор саҳнага чиқди ва ҳал қилувчи зарбани йўллаб, жамоасига олтиндек қадрли уч очкони тақдим этди. Шу тариқа, «Болонья» энг сўнгги лаҳзаларда топилган гол эвазига жуда муҳим муваффақиятни қўлга киритди.
Пиза — Болоня 0:1
Гол: Одгор (90).
Бу ғалаба «Болонья» учун шунчаки навбатдаги уч очко эмас. Жамоа 39 очко билан Европа мусобақалари учун курашда ўз умидларини сақлаб қолди ва мавсумнинг ҳал қилувчи палласида руҳий жиҳатдан ҳам катта туртки олди. Айниқса, бундай қийин сафар ўйинларида охирги дақиқаларда ғалабани тортиб олиш кучли характер белгиси сифатида баҳоланади. «Пиза» эса 15 очко билан хавфли ҳудуддан чиқиб кета олмади ва ўз аҳволини янада мураккаблаштириб олди.
Иккинчи баҳсда эса «Удинезе» ўз майдонида «Фиорентина»ни аямади. Учрашув 3:0 ҳисобида мезбонларнинг ишончли ғалабаси билан якунланди. «Удинезе» сафида Кристиан Кабаселе 10-дақиқада ҳисобни очди, Кинан Дэвис 64-дақиқада пенальтидан устунликни мустаҳкамлади, Адам Букса эса қўшимча дақиқаларда якуний нуқтани қўйди.
Удинезе — Фиорентина 3:0
Голлар: Кабаселе (10), Дэвис (64, пеналти), Букса (90+4).
«Фиорентина» учун бу мағлубият янада аламли кўринди, чунки жамоа аллақачон жадвалнинг хавфли қисмига яқин юрибди. 24 очко билан пастки поғоналардан узоқлаша олмаётган жамоа бу турда вазиятини яхшилаб олиш ўрнига яна муҳим очколарни бой берди. «Удинезе» эса 35 очкога етиб, ўрта қатламдаги ўрнини янада мустаҳкамлади ва бу ўйинда ҳам тартибли, совуққон футбол намойиш этди.
Қисқаси, 27-тур якунидаги бу икки натижа А Серияда кураш нақадар қизиб бораётганини яна бир бор кўрсатди. «Болонья» сўнгги сонияларда топилган ғалаба билан олдинга қадам ташлади, «Фиорентина» эса аксинча, яна босим остида қолди. Энди мавсумнинг кейинги турларида ҳар бир очко янада қиммат бўлади — айниқса, кимдир Европа сари интилаётган, кимдир эса пастга қулащдан қочаётган бир пайтда.