Флик кечаги мағлубиятдан сўнг тан олди: "Жирона" ғалабага ҳақли эди
Ла Лиганинг 24-турида “Барселона” сафарда “Жирона”га 1:2 ҳисобида мағлуб бўлиб, муҳим очколардан қуруқ қолди. Учрашувдан кейин каталонияликлар бош мураббийи Ҳанс-Дитер Флик ўйин ҳақида очиқ ва қатъий фикр билдирди — у бу сафар баҳона қидирмади, аксинча рақибнинг ғалабасини тўлиқ эътироф этди.
Мутахассиснинг таъкидлашича, “Жирона” майдонда ғалабага ҳақиқатан муносиб бўлган. Флик “Барселона”нинг энг катта муаммоси айнан ҳимояда кўринганини алоҳида урғулади. Айниқса, қарши ҳужумлар пайтида жамоа рақибга ҳаддан ташқари катта ҳудуд ва эркинлик бериб қўйган.
“Жирона бугун ғалабага лойиқ эди. Биз жуда ёмон ҳимояландик, айниқса қарши ҳужумлар вақтида рақибга жуда катта кенгликни тақдим этдик”, — деган мазмунда фикр билдирди Флик.
Унинг сўзларига кўра, муаммо фақат ортда эмас, марказда ҳам сезилган. Бош мураббий ярим ҳимоя чизиғи кутилган даражада ишламаганини, ўйинни бошқариш ва темпни назорат қилиш масаласида жамоа ўз талабига жавоб бермаганини ҳам қайд этди.
“Бугун ярим ҳимоячиларимиз биз истаган ўйини кўрсатишмади”, — деди у.
Ушбу мағлубиятдан кейин “Жирона” 29 очко билан турнир жадвалида 12-ўринда қолди, “Барселона” эса 58 очко тўплаб, иккинчи поғонада турибди. Бир қарашда жойи ўзгармаган бўлиши мумкин, лекин бундай ўйинлар чемпионлик пойгасида “қимматга тушадиган” кечалардан бўлади.
Фликнинг чиқиши эса мухлисларга битта нарсани англатади: жамоа муаммоларни кўриб турибди ва уларни яшириш нияти йўқ. Энди энг муҳими — кейинги турларда шу хатолардан тўғри хулоса чиқариш ва айниқса қарши ҳужумлардаги бўшлиқларни ёпиш. Чунки Ла Лигада кечирим кам, рақиб эса ҳар бир очиқ зонадан фойдаланиб қолади.