Уч зарба ва тўртта гол: «Вильярреал» «Эспанол»ни ютди

Ла Лиганинг 23-турида «Вильярреал» – «Эспанол» учрашуви ноодатий сценарийда кечди: 87-дақиқагача ҳар икки жамоа жамлаб атиги уч марта дарвоза тўрига аниқ зарба берган бўлса-да, таблодаги ҳисоб 4:0 эди. Бу ҳақда euro-football.ru хабар беради.

Ўйин бошида меҳмонлар Тайрис Долан узатмасидан кейин Омар эл-Ҳилали орқали саккиз метр масофадан гол ургандек бўлди, бироқ ҳужумдаги қоида бузилиши қайд этилиб, гол бекор қилинди. 35-дақиқада «Вильярреал» ҳисобни очди: чап қанотдан узатма узоқ устунга борди, Тейжон Бьюкенен тўпни Жорж Микаутадзега оширди ва у бурилиб туриб, ҳаводан ўнг юқори бурчакка аниқ зарба йўллади — 1:0. Орадан кўп ўтмай Альберто Молейро жарима майдонига ёриб кириб, марказга пас узатди, Хосе Салинас узатмани тўсмоқчи бўлиб, тўпни ўз дарвозасига киритиб юборди — 2:0.

Иккинчи бўлим бошида Молейро марказдан Николас Пепени олдинга ташлади, Пепе жарима майдонига кириб бориб 15 метр масофадан пастдан ўнг бурчакка аниқ тепди — 3:0. Кўп ўтмай Молейро Микаутадзедан пас олиб, 12 метрдан узоқ бурчакка йўллаган зарбаси билан ҳисобни йириклаштирди — 4:0. Якунда «Эспанол» Пол Лосано орқали узоқдан хавфли уринди, дарвозабон вазиятни қутқарди, аммо 88-дақиқада бурчак зарбасидан кейин Шарл Пикелнинг узатмасини Леандро Кабрера боши билан голга айлантирди — 4:1.

Шу ғалаба «Вильярреал»га турнир жадвалида учинчи ўриндаги «Атлетико»га етиб олиш имконини берди. «Эспанол» эса кетма-кет тўртинчи мағлубиятидан сўнг олтинчи поғонада қолмоқда.