Маненинг ушбу сўзлари жамоани майдонга қайтарди: Сенегал чемпион бўлди

Сенегал терма жамоаси вингери Садио Мане Марокаш терма жамоасига қарши Африка Кубоги финалида (1:0) фақат майдонда эмас, балки майдон ташқарисида ҳам ўйин тақдирини ҳал қилган асосий қаҳрамонлардан бирига айланди. Финалнинг кескин ва асабни қитиқлайдиган лаҳзаларида жамоани бир жойга жамлай олиш ҳам кўп нарсани англатади — Мане айнан шуни намоён қилди.

Баҳс давомида Сенегал дарвозаси томон баҳсли пенальти белгилангач, жамоа бош мураббийи Пап Тиав ҳаккам қарорига кескин норозилик билдириб, футболчиларини майдондан олиб чиқиб кетишга қарор қилди. Ўша пайтда вазият жуда “портлаш” арафасида эди: финал, босим, адолатсиздек туюлган қарор — ҳаммаси бир нуқтада тўпланиб қолган.

Шу ноқулай сонияларда ташаббусни Садио Мане ўз қўлига олди. Терма жамоа етакчиси жамоадошларига ҳиссиёт билан мурожаат қилди, уларни совуққонликка чақирди ва энг муҳими — ўйинга қайтишга кўндирди. “Foot Mercato” маълум қилишича, Мане ўша пайтда қисқа, лекин жуда ўткир маъноли гапни айтган:

Биз эркаклардек ўйнаймиз!

Бу сўзлар сенегалликлар учун сигнал бўлди: жамоа қайта майдонга чиқди, финални давом эттирди. Ва ўша пенальтида Марокаш футболчиси Браим Диас 11 метрли зарбадан фойдалана олмади. У “паненка” услубини танлади, аммо тўп тўғридан-тўғри дарвозабон Эдуар Менди қўлига бориб тушди. Бир лаҳза — ва ўйин руҳи бутунлай ўзгарди.

Шундан кейин Сенегал янада ишончли ҳаракат қилди. Омад ҳам қўшимча вақтда айнан улар томонга оғди: Папа Гейенинг аниқ зарбаси финалга нуқта қўйди ва Сенегалга ғалабани олиб келди.

Бу натижа Сенегал терма жамоаси учун алоҳида аҳамиятга эга: жамоа ўз тарихида иккинчи марта Африка қитъаси чемпиони унвонини қўлга киритди. Ушбу финал эса нафақат гол, балки руҳ, характер ва бир сўзнинг қанчалик кучли экани билан мусобақа тарихидаги энг ҳиссиётли баҳслардан бири сифатида узоқ эсда қолади.