"Барселона" Суперкубок финалида: "Атлетик" 5:0 ҳисобида таслим қилинди
Саудия Арабистонида ўтаётган Испания суперкубогида биринчи яримфинал ҳақиқий намойишкорона спектаклга айланди. Ла Лиганинг амалдаги чемпиони ва мамлакат кубоги соҳиби «Барселона» «Атлетик»ка деярли ҳеч қандай имконият қолдирмай, 5:0 ҳисобида йирик ғалабани расмийлаштирди.
7 январ куни Жидда шаҳридаги «King Abdulla Sports City» аренасида бўлиб ўтган тўқнашувда каталонияликлар биринчи дақиқаларданоқ темпни юқори қўйди. Ўйиннинг 22-дақиқасида Ферран Торрес ҳисобни очди. Орадан кўп ўтмай, 30-дақиқада Фермин гол уриб, устунликни янада мустаҳкамлади. 34-дақиқада Бардакчи ҳисобни катталаштирди, 38-дақиқада эса Рафиня рақибни яна бир бор “синдирди” — биринчи таймнинг ўзиёқ «Атлетик» учун оғир ҳукм бўлиб чиқди.
Иккинчи бўлимда ҳам «Барселона» газни туширмади. 52-дақиқада Рафиня дублни расмийлаштириб, ўйинга нуқта қўйди. Қисқаси, майдонда “кўрсатма бериб қўйишди-ю, ҳаммасини бажариб ташлашди” деган манзара: рақибда жавоб бериш учун на вақт, на ҳужум, на руҳ қолди.
Учрашув қаҳрамонлари ичида Рафиня алоҳида кўзга ташланди: у дубл ҳам қилди, ассист ҳам ёздириб қўйди. Фермин ва Бардакчи эса биттадан гол уриб, яна иккитадан голли узатма билан статистикасини “чиройли” қилиб қўйишди. Яъни, бу кеча «Барселона» ҳужумидаги ҳар бир босиш “мумкин” эмас, “албатта”га ўхшаб кетди.
Энди эътибор иккинчи яримфиналга қаратилди: 8 январ куни Мадриднинг икки азалий рақиби — «Реал» ва «Атлетико» ўзаро тўқнаш келади. Бир томонда — ғурур, иккинчи томонда — характер. Жиддадаги навбатдаги кеча ҳам “бемаза” бўлмайди, шубҳасиз.
Саудия суперкубоги. Яримфинал
Барселона — Атлетик 5:0
7 январ. Жидда. «King Abdulla Sports City»
Голлар: Торрес (22), Фермин (30), Бардакчи (34), Рафиня (38, 52).
Барселона — Жоан Гарсия, Балде (Мартин, 64), Кубарси, Эрик Гарсия, Кунде, Де Йонг (Бернал, 64), Педри (Олмо, 72), Фермин, Бардакчи (Ямал, 72), Рафиня (Рэшфорд, 65), Ферран.
Атлетик — Симон, Аресо, Вивиан, Паредес, Боиро (Мартинес, 57), Хаурегисар, Рего (Санчес, 65), Беренгер, Сансет (де Галаррета, 54), Наварро (Гомес, 54), И. Уилямс (Гурусета, 54).