Арман Царукянга нега чемпионлик жанги берилмаяпти?
Ярим ўрта вазн тоифасида UFC чемпиони ҳисобланган Ислом Махачев енгил вазн рейтингида биринчи ўринда бораётган Арман Царукян нега ҳалигача чемпионлик жангига чиқарилмаётгани ҳақида очиқ фикр билдирди.
Россиялик жангчининг айтишича, бу ҳолат улар ўртасида режалаштирилган, аммо амалга ошмай қолган жанг билан бевосита боғлиқ. Махачевнинг таъкидлашича, Лос-Анжелесда ўтиши керак бўлган катта турнир олдидан барча эътибор айнан шу тўқнашувга қаратилган эди. Бироқ Арман Царукяннинг жароҳат сабаб баҳсдан чиқиб кетиши унинг обрўсига салбий таъсир кўрсатган.
— Ўша вазият Арман учун катта “минус” бўлди. Менимча, Дана Уайт бундан жуда норози бўлган. Ҳозир фақат Царукян эмас, балки бошқа айрим жангчилар ҳам шу воқеа оқибатида қийинчиликларга дуч келяпти, — деди Махачев “Ушатайка” нашрига берган интервьюсида.
Шу билан бирга, Ислом Махачев ўз позициясини ҳам очиқ айтди. Унинг фикрича, спорт тамойиллари нуқтаи назаридан Арман Царукян камар учун курашишга энг муносиб жангчилардан бири ҳисобланади.
— Агар холис баҳо берадиган бўлсам, Арман чемпионлик жангига бошқалардан кўра кўпроқ лойиқ, — дея қўшимча қилди у.
Эслатиб ўтамиз, Махачев ва Царукян 2025 йил 18 январь куни UFC 311 турнири доирасида октагонга чиқиши керак эди. Аммо Арманнинг бел қисмидаги жароҳат сабаб ушбу жанг бекор қилинган ва Ислом бразилиялик Ренато Мойканога қарши чиқишга мажбур бўлганди.
Бу воқеа UFC ичидаги чемпионлик навбати қандай шаклланаётганини яна бир бор кун тартибига олиб чиқди. Келажакда Царукянга имконият бериладими ёки йўқ — бу савол ҳали очиқ қолмоқда.