Нега "Барса" қимматбаҳо футболчиси билан хайрлашишга тайёр?
???? Каналга қўшилинг! ????
https://t.me/joinchat/AAAAADwt0NGCRoONT4f1_Q
???? Каналга қўшилинг! ????
https://t.me/joinchat/AAAAADwt0NGCRoONT4f1_Q " />
“У ҳамма категориялар бўйича фантастик футболчи. У майдон марказининг ўнг қисмида туриб ҳимоячилар ишини анча енгиллаштиради, бу борада Мессига ҳам ёрдам беради. У тўп билан яхши муомала қилади, техник жиҳатдан ҳам кучли” – деган эди Жозе Моуриньо Ракитич ҳақида. Португалиялик мураббий ўз гапларига қўшимча сифатида Иван дунёнинг энг қимматбаҳо футболчиларидан бири эканлигини таъкидлаб ўтган. Лекин “Барса” мураббийи Эрнесто Валверденинг қарашлари Жозе Моуриньоникидан фарқ қиляпти. Валверде қўл остидаги жамоада Ракитичга ўрин йўқдек, гўё. Декабр ойигача бўлган ўйинларнинг бор-йўғи биттасида асосий таркибда тушди хорват футболчиси. Охирги ҳафтада эса 2 марта асосий таркибда майдонга тушганини ҳисобга олсак, мавсум бошидан буён Иван Ракитич 3 марта асосий таркибда ўйинни бошлаган. Бу мавсумда футболчи майдонда 392 дақиқа ўтказди ва 15 та ўйиннинг 10 тасида иштирок этди. Ракитич даражаси учун бу вақт жуда кам ҳисобланади. Ҳа, Ракитич энди ёш эмас, келаси март ойида 32 ёшни қарши олади. Лекин у юқори даражада ўйин кўрсата олади, жамоага фойдаси тегади. Лекин жамоа уни ҳисобдан чиқаришни истайди. Ёз ойида уни Неймар трансферининг бир қисми сифатида қўшиб берилиши ҳақида миш-мишлар тарқаган эди. Заҳира ўриндиғида кўпроқ вақт ўтказаётган футболчи жамоани тарк этиши фантастик кетиш ҳисобланмаса керак. Иваннинг жамоа билан шартномаси 2021 йил ёз ойида якунланади. Лекин футболчи ундан олдинроқ, январдаги трансфер ойнасида ёки 2020 йил ёз ойида жамоани тарк этиш эҳтимоли бор. Афсуски, “Барселона” Ракитичга майдонда керакли позиция танлаб беролмаяпти. Нашрлар хабарига кўра, футболчига Англия, Испания ва Италия клублари жиддий қизиқиш билдиряпти. Янаям очиқроқ айтадиган бўлсак, футболчи учун “Манчестер Юнайтед”, “Милан”, “Интер” ва “Атлетико” кураш олиб боряпти. Агарда трансфер амалга ошадиган бўлса, Ракитич вариантлар ичидан энг мосини танлаши керак. Масалан, “МЮ” футболчи учун яхши вариант. Молиявий томондан ҳам, жамоанинг ҳозирги ҳолатидан ҳам. Ракитичнинг ўтиши жамоа ўйинини кучайтириши мумкин ва хорватиялик футболчи ўз статусини янада ошириш имкониятига эга бўлади. Ҳозир Ракитич қандай аҳволда? У жамоага ўзини кераксиздек ҳис қиладиган ҳолатгача қандай етиб келди? Ахир 5 йил давомида жамоанинг асосий таркиб футболчиларидан бири эдику?! Қанчалик истамайлик, вақт барибир ўз сўзини айтади. Бир пайтлар ажралмас учлик ҳисобланган, Хави, Иньеста ва Бускетс учлигидан фақат охирги саналган футболчи жамоада қолди. Артур, Френк Де Йонг каби ёш футболчилар уларнинг ўрнига келишган ва жамоанинг келажаги дея аталмоқда. Ракитичда эса бу учун вақт ҳам ёш ҳам етарли эмас. Бир интервьюсида Ракитич: “Нима деб ўйлайсиз, болакайдан севимли ўйинчоғини тортиб олишса, нима қилади? У жудаям қаттиқ хафа бўлади. Мени ҳолатимни тушундингиз деб ўйлайман.” Валверде ҳам Ракитич ҳақида саволларни эътиборсиз қолдиришга уринмоқда. Ноябр ойидаги конференциялардан бирида Валвердедан Ракитичнинг келажаги борасида бирор нима дейишни сўрашганида “Ракитич ҳақида ҳеч нарса демайман” деб, бундай саволлар унга ёқмаётганини очиқ аён қилиб қўйган эди. Ўтган мавсумда айнан Ракитич тўп узатишлар борасида Ла Лига етакчиси бўлган эди. Унинг ҳисобида 2480 та пас бор эди, унинг 92%и аниқ узатмалар эди. Нега шундай кўрсаткичга эга бўлган футболчи бир неча ой ўтиб заҳира ўриндиғига михланиб қолди? Ёш борасида гапирадиган бўлсак, тушунарли, лекин жуда қисқа муддат ичида у кераксиз футболчига айланиб қолмадими? Балки, Де Йонгнинг жамоага олиб келиниши ҳам бунга сабабдир. Ахир жамоа футболчи учун 75 млн евро тўлади. Айнан у мавсум бошидан буён Ракитич ўйнаган позиция, ўнг қанот, марказда майдонга тушяпти. Бундай пайтда Ракитичга майдондан жой топиб бериш мушкул, албатта. Лекин охирги пайтларда нашрлар ёзишича, жамоа футболчини шартнома муддати якунлангунига қадар сақлаб қолишга уринади. АПЛнинг қайсидир жамоаси футболчи учун 13 млн евро таклиф қилган. Аммо “Барселона” бу таклифни рад этган. Чунки футболчини 30 млндан камига сотмоқчи эмас. Футболчи “Интер”га ўтиб кетиши ҳам мумкин. Конте анчадан буён хорватиялик футболчи хизматларига қизиқиш билдиряпти. Италия жамоаси марказида муаммолар юзага келган ва Конте тезроқ Ракитични жамоага олиб келишни истамоқда. Ҳамма гап “Барселона”да қолган. У футболчини сотадими ёки йўқ?! Ахир, у жамоа учун қадрли футболчи. Эркинжон Ғайбуллаев