Կրիմինալը ընտրություններին փող բաժանելու մեջ է. գուցե դրանից էլ էվոլյուցիոն ճանապարհով ազատվենք. Վազգեն Մանուկյան
Եթե դիտարկենք 1990 թ. ընտրություններն, ապա բավականին կրիմինալ էլեմենտներ կային՝ իրար հետ կռվել, թուղթ գցել, «կարուսել» և այլն, բայց չկար մի ուժ, որը կարող էր կեղծել ամբողջ ընտրությունները: Նման տեսակետ է հայտնել Հանրային խորհրդի նախագահ Վազգեն Մանուկյանն «Արմենիա» հեռուստաընկերության «Ռ-էվոլյուցիա» հաղորդման եթերում: Նրա խոսքով՝ այդ ընտրությունների վերջնական արդյունքն, ըստ սոցիոլոգիական հարցումների, մոտավորապես համընկնում է ժողովրդի կարծիքի հետ:
«Ես հիշում եմ՝ իմ հաշվարկի ժամանակ, երբ ձայները հաշվում էին, Արշակ Սադոյանը հանձնաժողովի նախագահին մեղադրում էր, թե ձայներ են կեղծում, նա վրդովվեց, ասաց՝ ես դպրոցի ուսուցիչ եմ, դու ի՞նչ իրավունք ունես, ուսուցիչն ինչպե՞ս կարող է կեղծել: Այդ մի բանն այն ժամանակ կար՝ ուսուցիչը չէր կարող կեղծել»,- հիշել է Վազգեն Մանուկյանը:
Նա պատմել է, որ մարդիկ այն ժամանակ փող չէին վերցնում, բայց ներքին գզվռտոց, իհարկե, կար: Վազգեն Մանուկյանն այն ժամանակ մեծամասնականով է անցել, ներկայացրել է ծրագրեր, ժողովուրդը գնացել, քվեարկել է, և ինքը 60-63 տոկոս ստացել է:
«Եթե մենք 6-րդ գումար ԱԺ-ի ընտրությունները գնահատում ենք Սկանդինավյան երկրների ընտրությունների հետ համեմատելով, ապա, իհարկե, պետք է ասենք, որ վատ ընտրություններ էին: Մենք վերցնում ենք այն համեմատականը՝ զարգացման մեջ սա քա՞յլ էր, թե՞ քայլ չէր»,- ասել է Հանրային խորհրդի նախագահը:
Նա ընտրությունները պայմանականորեն բաժանում է երեք հատվածի: Առաջինը, թե թեկնածուն ինչ հնարավորություններ ունի քարոզելու, ներկայացնելու ծրագրերը և այլն: Հանրային խորհրդի նախագահի կարծիքով՝ ժամանակներ են եղել, որ բավականին դժվար է եղել, հեռուստատեսությունը փակ է եղել թեկնածուների համար, երբեմն հանրահավաքն է արգելված եղել, բայց տարեցտարի լավանում է վիճակը: Նա համարել է, որ այստեղ ոչ մի բողոք չկա, բոլորը հնարավորություններ ունեն:
«Ընտրությունները կեղծվում էին վերջնական՝ երրորդ հատվածում: Երրորդ հատվածն այն էր, ինչ կատարվում էր տեղամասում: Տարիներ կային, որ բերում, կեղծ բյուլետեններ էին գցում, տարիներ կային, որ քվեարկում էին ավելի շատ մարդկանց անունից, այդքան մարդ չկար, ասում էինք՝ ցուցակ տպեք, ով է քվեարկել: Շատ անգամ սխալ էին հաշվում: Մեկի թուղթը դնում էին մյուս թեկնածուի քվեաթերթիկների վրա և հաշվում էին: Այսինքն՝ ամենամեծ կեղծումները տեղի էին ունենում այդ երրորդ բլոկում»,-պարզաբանել է Վազգեն Մանուկյանը:
Ընտրությունների պայմանական երկրորդ մասում նա առանձնացրել է այն աշխատանքը, որ կատարվում է ժողովրդի հետ: Երբ թիմը մտնում է տնետուն, ցուցակներ է կազմում, ով պետք է իր համար քվեարկի, եթե մեկը տկար է, օգնում է, որ գնա ընտրության, այդտեղ, ըստ Վազգեն Մանուկյանի, կրիմինալ չկա:
«Կրիմինալը փող բաժանելու մեջ է: Այս տարի խոսակցությունները շատ էին, որ փող է բաժանվել և շատ: Այսինքն՝ կեղծիքները եղել են ընտրատեղամասից դուրս, եղել է երկկողմանի համաձայնություն, մեկը փող է տվել, մյուսը՝ վերցրել: Իսկ առաջին և երրորդ բլոկը, ես կարծում եմ, մաքուր էլ կմնա»,-վստահեցրել է Հանրային խորհրդի նախագահը:
Թե ինչ պետք է արվի ընտրակաշառքը վերացնելու համար՝ Վազգեն Մանուկյանը դժվար հարց է համարել:
«Եթե մարդկանց կենսամակարդակը բարձրանա, ներքին հպարտություն զգան՝ չեն վերցնի, եթե չվերցնեն՝ տվող էլ չի լինի: Գուցե դա էլ էվոլյուցիոն ճանապարհով լինի, մյուս անգամ դրանից էլ ազատվենք»,-ասել է Վազգեն Մանուկյանը: