Պետք է զբաղմունք ստեղծենք, որ Ջերմուկում հանգստացողը երրորդ օրը չհոգնի, Ջերմուկը պետք է գրավիչ դառնա զբոսաշրջիկների համար. վարչապետը հանդիպել է ջերմուկցիներին
ՀՀ զբոսաշրջային կենտրոններից մեկը համարվող Ջերմուկում հյուրանոցների կողքին պետք է լինի կինոթատրոն, թատրոն, որպեսզի Ջերմուկում հանգստացողներն իմանան նաև՝ ինչով են զբաղվելու, որպեսզի երրորդ օրը չհոգնեն:
Այս մասին այսօր Ջերմուկում՝ քաղաքի բնակիչների հետ հանդիպմանը, հայտարարեց Սյունիքում նախընտրական քարոզչության շրջանակներում եռօրյա այցով գտնվող վարչապետ Կարեն Կարապետյանը: Նա բնակիչներին տեղեկացրեց, որ քայլեր են ձեռնարկվում Ջերմուկը ինչպես զբոսաշրջիկների, այնպես էլ ջերմուկցիների համար ավելի գրավիչ դարձնելու ուղղությամբ:
«Ավելի ձեռնտու է հյուրանոց կառուցելը, ամենալավ բիզնեսն է դա, բայց մինչև մեր հաճախորդների համար զբաղմունք չստեղծենք, Ջերմուկում հանգստացողները երրորդ օրը կհոգնեն: Մենք ամբողջ աշխարհից ուզում ենք, որ մեզ սիրեն, բայց մենք դրա համար ոչ մի քայլ չենք անում: Եկեք այնպես անենք, որ մեր ծառայությունները կարողանանք վաճառել, Ջերմուկը զարգացնենք, զբոսաշրջիկին գրավենք»,- ասաց վարչապետ Կարեն Կարապետյանը:
Նա, ի դեպ, նմանատիպ վիճակ ախտորոշեց նաև Երևանում:
Հիշեցնենք, որ երեկ նախընտրական քարոզարշավի շրջանակներում Սյունիքի մարզ կատարած այցի ընթացքում Կարեն Կարապետյանը եղավ «Ագարակի պղնձամոլիբդենային կոմբինատ»-ում և Ագարակի մշակույթի պալատում, հանդիպում ունեցավ Մեղրու մարզամշակութային կենտրոնում, ինչպես նաև «Զանգեզուրի պղնձամոլիբդենային կոմբինատ»-ում, այնուհետև Քաջարանի պղնձամոլիբդենային կոմբինատի մշակույթի պալատում:
Օրվա ավարտին Կապանի Գարեգին Նժդեհի անվան հրապարակում Վարչապետը հանդիպել է բնակիչների հետ: Իսկ ավելի վաղ Գորայք, Սիսիան և Գորիս համայնքների ընտրողներին ներկայացրել ՀՀԿ նախընտրական ծրագրի դրույթները, նախատեսվող բարեփոխումները և պատասխանեց բնակիչներին հուզող հարցերին:
«Մեր բացթողումները, մեր դրական ու ուժեղ կողմերը հասկանալով՝ հայտարարում ենք, որ ուզում ենք փոխվել, փոխվում ենք ու փոխելու ենք: Մեր տնտեսական զարգացման ծրագրի հիմքում այն գաղափարն է, որ մեր երկրի հիմնական առավելությունը, հիմնական կապիտալը մարդն է՝ իր կարողություններով, ստեղծագործ աշխատանքով, և պետք է բոլոր պայմանները ստեղծենք, որպեսզի մարդը կարողանա իր աշխատանքով իր տունը պահել, իրեն ոչ ոք չխանգարի, արդարություն լինի, աշխատանքն արժանավայել գնահատվի, հնարավորություն տանք նրան, որպեսզի ստեղծի հավելյալ արժեք»,- ասել էր Կարեն Կարապետյանը: