Ընտրությունները խորքային իմաստով որևէ բան տալ չեն կարող՝ ՀՀ քաղաքական ընտրանին նույն փիլիսոփայության մեջ է. Աշոտ Մանուչարյան
Խորհրդարանական ընտրությունները խորքային իմաստով որևէ բան տալ չեն կարող: Հայաստանի քաղաքական ընտրանին նույն փիլիսոփայության մեջ է և դրանով որևէ բան փոխել հնարավոր չէ:
Այս մասին այսօր հրավիրած ասուլիսում ասաց «Ղարաբաղ» կոմիտեի անդամ Աշոտ Մանուչարյանը՝ հավելելով, որ խիստ կարևոր է գործող համակարգին զրկել իշխանությունից:
«Որ երկիրը ուրիշ բան տեսնի շնչի, որ ժողովուրդը համախմբի, ստեղծի, կառուցի, էդպիսի ծրագիր չկա: Մեր քաղաքական դասը, քաղաքական ընտրանին ձևավորվել է նույն փիլիսոփայության մեջ, որը դրված է նախկին խորհրդային հանրապետություններում, ներկա ու նախորդ ծրագրերը քիչ են տարբերվում իրարից: Ժողովրդին համախմբող, ինչ-որ բան ստեղծելու, կառուցելու ծրագիր չկա, ներկայացված ծրագրերն ընդամենը մի քիչ քիչ կոռուպցիայի կամ մի քիչ քիչ մենաշնորհների խոստումներն են»,- ասաց Մանուչարյանը:
Աշոտ Մանուչարյանը «Հոգևոր Հայաստանի» առաջարկն է փոխարինող համարում։ «Դրվել է մի մեծ գերխնդիր՝ հայության համախմբման: Մտավորականությունը մարտին հրավիրում է հայության համաժողով Երևանում: Եթե բոլոր ուժերը լծվեն, դա մեծ ստարտի հնարավորություն կլինի: Հայ ժողովուրդը միևնույն է՝ վաղ թե ուշ գնալու է այդ ճանապարհով»,-ասաց Մանուչարյանը:
Նրա խոսքով՝ կուսակցությունները ֆորմալ ասել են՝ աջակցում ենք «Հոգևոր Հայաստանին, բայց ոչինչ չի հետևել դրան: