ԼՂ հակամարտության կարգավորման գործում Թուրքիան անելիք չունի. Կիրո Մանոյան
Թուրքիան Լեռնային Ղարաբաղի հակամարտության կարգավորման գործում անելիք չունի: Tert.am-ի հետ զրույցում այս մասին ասաց «Հայ Յեղափոխական Դաշնակցություն» Բյուրոյի Հայ դատի և քաղաքական հարցերի գրասենյակի տնօրեն Կիրո Մանոյանը։
«Ադրբեջանցիների ազդեցությունը Թուրքիայում մեծանում է, ուստի չի բացառվում, որ դեսպանը որոշել է հակակշել իրավիճակը: Այնուամենայնիվ, սա նորություն չէ. Թուրքիայի ցանկությունը միշտ էլ Լեռնային Ղարաբաղի հակամարտության կարգավորմանը մասնակցելն է: Թուրքիան նույնիսկ Հայաստանի հետ հարաբերություններն է պայմանավորում Հայաստան-Ադրբեջան հարաբերություններով»,- նշեց Կիրո Մանոյանը:
Հիշեցնենք, որ Ադրբեջանում Թուրքիայի դեսպան Էրքան Օզորալը երեկ Բաքվում կրկին հայտարարել էր, որ Լեռնային Ղարաբաղի հիմնահարցը ոչ միայն Ադրբեջանի, այլև Թուրքիայի խնդիրն է։ Նման հայտարարությունները՝ հատկապես Օզորալի կողմից, վերջերս ակտիվացել են: Կիրո Մանոյանն ասաց, որ այս հայտարարությունների բնույթը քարոզչական է, իսկ թիրախը՝ թուրքաբնակ ադրբեջանցիներն են:
Անդրադառնալով թեմային՝ ՀՅԴ Բյուրոյի Հայ դատի և քաղաքական հարցերի գրասենյակի տնօրենը նշեց, որ հարցն անուղղակի կարելի է կապել նաև ԵԱՀԿ Մինսկի խմբի ամերիկացի համանախագահի հեռանալու և գուցե նոր համանախագահի վրա ազդելու հնարավորության հետ: