Կառավարությունը գնել է ոչ թե 1, այլ 245 անուն ապրանք և ոչ թե 19, այլ 12,036,013 դրամի չափով. Շուշան Սարդարյան
ՀՀ կառավարությունից «Հայկական ժամանակ» օրաթերթի այսօրվա «19 միլիոնանոց» հրապարակման առթիվ Tert.am -ին հայտնում են, որ կառավարությունը գնել է ոչ թե 1 անուն, այլ 245 անուն ապրանքներ։
«ՀՀ կառավարության աշխատակազմի 2016 թվականի գնումների պլանով ամբողջ տարվա համար հաստատված 18,914,900 ՀՀ դրամ ընդհանուր գումարով «ավտոմեքենաների պահեստամասեր» տողն իր մեջ ներառում է 245 անվանում (չափաբաժին) պահեստամասեր՝ ընդհանուր 1780 միավոր (հատ, տուփ կամ հավաքածու) ապրանքներ: Միաժամանակ հայտնում եմ, որ 2016 թվականի նոյեմբերի 23-ի դրությամբ վերը նշված գումարի շրջանակներում ավտոմեքենաների պահեստամասերի ձեռքբերման նպատակով կնքված պայմանագրերի ընդհանուր գումարը կազմում է 12,036 013 ՀՀ դրամ», -ասաց վարչապետ Կարեն Կարապետյանի խորհրդական Շուշան Սարդարյանը:
Նշենք, որ ՀԺ-ն գրել էր, որ ՀՀ կառավարությունն այս տարի իր գնումների պլանով բավականին ուշագրավ մի գնում է նշել՝ 18 մլն 915 հազար դրամով մեքենայի մեկ պահեստամաս է ձեռք բերել, և փաստաթղթում նշված չէ, դա ինչ պահեստամաս է և ինչ մեքենայի համար:
«Այնուամենայնիվ, հնարավոր չէ պատկերացնել, թե մոտ 40 հազար դոլարով այդ ինչ պահեստամաս կարելի է ձեռք բերել, երբ այդ գումարով ամբողջական շքեղ մեքենա է հնարավոր գնել: Թերևս կարելի է ասել, որ նման թանկարժեք պահեստամաս ձեռք բերված կլինի վարչապետի ծառայողական մեքենայի համար»,-գրել էր թերթը։