ԱՄՆ-ին չի հաջողվում կարգավորել սիրիական հակամարտությունը, ինչը բացասական ազդեցություն է ունենում Թուրքիայի վրա. Էրդողան
Թուրքիայի նախագահ Ռեջեփ Թայիփ Էրդողանն ամերիկյան CBS հեռուստաալիքի 60 Minutes հաղորդմանը տված հարցազրույցի ժամանակ ասել է, որ ԱՄՆ-ին չի հաջողվում կարգավորել սիրիական հակամարտությունը, ինչն ուղղակիորեն բացասական ազդեցություն է ունենում Թուրքիայի վրա՝ վտանգելով երկրի հարավային սահմանի անվտանգությունը և նպաստելով փախստականների հոսքի աճին:
«Մենք այս հարցերի շուրջ խոսել ենք նախագահ Բարաք Օբամայի և փոխնախագահ Ջո Բայդենի հետ: Սակայն նրանք այս ամենին լուրջ չվերաբերվեցին, ինչը չափազանց հիասթափեցնող է մեզ համար»,-ասել է Էրդողանը՝ ընդգծելով, որ ինքն այդ ամենն ասում է ամենայն անկեղծությամբ:
Էրդողանն ամերիկյան CBS հեռուստաալիքին տված հարցազրույցում ասել է նաև, որ հիասթափված է մի շարք հարցերում Միացյալ Նահանգների վարած քաղաքականությունից:
Հարցազրույցի ժամանակ թուրք ղեկավարն անդրադարձել է իր գլխավոր ընդդիմախոսներից մեկի՝ Փենսիլվանիա նահանգում բնակվող իսլամական քարոզիչ Ֆեթուլլահ Գյուլենի արտահանձնման հարցին՝ քննադատելով ԱՄՆ իշխանություններին նրան չհանձնելու համար:
«Ես ռազմական հեղաշրջման փորձի համար Միացյալ Նահանգներին չեմ մեղադրում, բայց ժողովուրդս հակառակ կարծիքին է: Ինչո՞ւ եք շարունակում պահել այդ մարդուն: Կներեք, բայց որքան երկար դուք նրան ապաստան տրամադրեք, այդքան երկար թուրք ժողովուրդը կմնա իր կարծիքին»,- ասել է Էրդողանը: