Մոսուլի գործողությունը պետք է իրականացվի տեղի ուժերի կողմից. Չավուշօղլու
Թուրքիայի արտաքին գործերի նախարար Մևլութ Չավուշօղլուն անդրադարձել է Իրաքի Մոսուլ նահանգում իրականացվելիք ռազմական գործողությանը, գրում է թուրքական «Էվրենսել» թերթը:
«Մոսուլի գործողությունը պետք է իրականացվի տեղի ուժերի կողմից, դա ամենաիրատեսական մոտեցումն է»,- ասել է Չավուշօղլուն:
Նա նաև հայտարարել է, որ թուրքական կողմը դեմ է գործողությանը շիա ուժերի ներգրավմանը:
«Եթե շիաները ներգրավվեն այդ գործողություններին, երկարաժամկետ խաղաղություն տարածաշրջանում չի լինի: Խնդիրները կշարունակվեն: Պետք չէ անել այնպես, որ Մոսուլի ժողովուրդը ստիպված լինի ընտրություն կատարել «Իսլամական պետություն» ահաբեկչական խմբավորման և շիաների խմբավորումների միջև: Մեր կողմից պատրաստված գրոհայինները, որոնք գտնվում են նահանգի Բաշիքայի ճամբարում, կազմված են հենց տեղի ուժերից, Մոսուլի ժողովրդից: Միջազգային կոալիցիոն ուժերը կարող են օգնել տեղի ուժերին, աջակցել», - հայտարարել է Չավուշօղլուն:
Հիշեցնենք, որ Իրաքի խորհրդարանը հոկտեմբերի 4-ին որոշում է ընդունել, որով երկրի Մոսուլ նահանգում թուրքական ԶՈՒ-ի իրականացնելիք ռազմական գործողություններն «անօրինական» են համարվում:
Դրան ի պատասխան Թուրքիայի վարչապետ Բինալի Յըլդըրըմն ու պաշտպանության նախարար Ֆիքրի Ըշըքը հայտարարել են, որ թուրքական ԶՈՒ-ն Իրաքից հեռանալ չի պատրաստվում և անպայման մասնակցելու է Մոսուլի գործողությանը:
«Իրաքի կառավարությունն ինչ ասում է` թող ասի, թուրքական ԶՈՒ-ն Իրաքի տարածքից դուրս չի գալու», - հայտարարել է Յըլդըրըմը:
Հիշեցնենք, որ թուրքական հատուկ նշանակության ուժերն օգոստոսի 24-ի առավոտյան մտել են Սիրիայի տարածք, իրենց իսկ խոսքով, «Իսլամական պետություն» խմբավորման գրոհայիններից հյուսիսային Ջերաբլուս քաղաքի ազատագրման գործողության շրջանակում: