«Հայաստան էքսպո»-ով հեղափոխություն չի լինի, բայց Իրանում որոշ մարդիկ զարմացել են, որ ՀՀ-ն այսպիսի որակյալ արտադրանք ունի. դեսպան
Հոկտեմբերի 5-8-ը 100-ից ավելի ընկերություններ են ներկայացվել Թեհրանի Միջազգային ցուցահանդեսների կենտրոնում կազմակերպված հայկական ապրանքների և ծառայությունների «Հայաստան էքսպո» ցուցահանդեսին․ Tert.am-ի հետ զրույցում այս մասին ներկայացրեց Իրանի Իսլամական Հանրապետությունում Հայաստանի Հանրապետության արտակարգ և լիազոր դեսպան Արտաշես Թումանյանը:
«200 քառակուսի մետր տարածք է տրամադրվել: Ցուցահանդեսը որևէ ուղղություն չունի, այնտեղ ներկայացված են Հայաստանի տնտեսության շատ ուղղություններ,- ասաց նա՝ նշելով դրանք՝ տեղեկատվական տեխնոլոգիաներ, բանկեր, ապահովագրական ընկերություններ, սննդի, մթերքների արտադրություն, դեղագործություն, թեթև արդյունաբերություն, ոսկերչություն, ադամանդագործություն, ճշգրիտ ճարտարագիտություն, զբոսաշրջային ընկերություններ և շինանյութերի արտադրություն:
Նշենք, որ ավելի վաղ ներկայացվել էր, որ ցուցահանդեսը կազմակերպել է Հայաստանի զարգացման հիմնադրամը՝ ՀՀ էկոնոմիկայի նախարարության և Իրանում Հայաստանի դեսպանության աջակցությամբ՝ Հայաստան-Իրան առևտրատնտեսական կապերի ակտիվացման նպատակով:
Ըստ դեսպանի՝ չնայած, որ ցուցահանդեսի կազմակերպման աշխատանքներում դեսպանատունը մեծ ներգրավվածություն է ունեցել, սակայն գործարարներին ուղղորդումներ չի տվել:
«Հայաստանում բոլոր պետական կառույցները, որոնք զբաղվել են այս գործով, տարածել են հայտարարություն, որ իրանական կողմը հայտնի կենտրոնում տրամադրում է տարածք և տարբեր լրատվական կայքերի միջոցով այդ հայտարարությունը տարածել են: Մենք Հայաստանի պետական մարմինների միջոցով դուրս ենք եկել հայկական լրատվական տարածք և փորձել ենք առաջարկություններ հավաքել: Մարդիկ դիմել են մեզ, որևէ ուղղության վրա հատուկ շեշտադրում չի եղել»,- ասաց Արտաշես Թումանյանը՝ նշելով, որ ցուցահանդեսում տարբեր ոլորտներ ներգրավելով՝ փորձել են ամբողջ Հայաստանը, նրա տնտեսությունը ներկայացնել:
Իրանում Հայաստանի դեսպանը նշեց, որ մեծ թվով բիզնես կազմակերպություններ են դիմել, անգամ հերթեր են առաջացել, սակայն տարածքը սահմանափակ էր:
«Մեզ հաջողվել է Հայաստանի տնտեսությունը ոչ վատ մակարդակով ներկայացնել»,- ասաց նա:
Հարցին, թե արդյոք իրանական կողմը հետաքրքրվա՞ծ է հայկական արտադրանքով և ծառայություններով, Արտաշես Թումանյանը պատասխանեց. «Այո, այդ հարցը առաջանում է՝ ինչու՞ պետք է Իրանը հետաքրքրվի Հայաստանով, որն ունի փոքր տնտեսություն, հայտնի չէ, տեղը չգիտեն քարտեզի վրա... Այստեղ արդեն պետք է գործով զբաղվի Հայաստանի դեսպանությունը: Անհամեստաբար պետք է ասեմ, որ շատ լուրջ քարոզչական աշխատանք է տարվում»:
Նա պատմեց, որ Իրանի բոլոր՝ 34 Առևտրի պալատներին, որոնք ուժեղ ֆունկցիոնալ օղակներ են, Իրանի բոլոր տնտեսական նախարարություններին, բոլոր հայտնի լրատվական գործակալություններին, ամենահայտնի լրատվամիջոցներին հաղորդվել, մամուլի ասուլիսների միջոցով ներկայացվել է «Հայաստան էքսպոյի» մասին:
«Բացման օրը հարյուրավոր այցելուներ կային: Այսօր կրկին մարդկանց մեծ հոսք կա,- ասաց դեսպանը՝ ավելացնելով, որ այստեղ կա բիզնես բարեկամների խումբ, որոնց հետ մշտապես կապի մեջ են, հնարավոր բոլոր աղբյուրներով այս միջոցառման մասին տեղեկացրել են, տեսնում ենք, որ հոսքը կա, «մնացածը կախված է բիզնես ընկերությունների գործելաոճից»։
Արտաշես Թումանյանը նաև նշեց, որ ցուցահանդես էին այցելել Իրանի պաշտոնատար անձինք՝ փոխնախարարի, նախարարի խորհրդականի մակարդակով:
«Երեկվանից է ցուցահանդեսը, ես ինքս էլ շրջում եմ տարածքով, չկա մեկը, որին չմոտենան, տեղեկատվության փոխանակություն չլինի, պրեզենտացիաներ չլինեն: Ասեմ նաև, որ որոշ կարևոր ոլորտներում, օրինակ՝ տեղեկատվական տեխնոլոգիաների ոլորտում, որով իրենց հավասար կամ գերազանցում ենք, սպասվում են համագործակցություններ: Այստեղ նաև կարևոր է պետության դերը, սպասում ենք փոխնախարարին, խոշոր ընկերությունների, որ գան, համագործակցեն»,- ասաց նա՝ ավելացնելով, որ անգամ հայկական երկաթուղիները ներկայացնող ընկերությունից են եկել, և այստեղ նրանց հետ երեք ժամանոց խորհրդակցություն է եղել:
Դեսպանը նշեց, որ «Հայաստան էսքպո»-ով հեղափոխություն չի լինի:
«Բայց պետք է ասել՝ լավ միջոցառում էր, առաջին անգամ էր այսպիսի դիապազոնով կազմակերպվում: Որոշ մարդիկ անգամ զարմացել էին, որ Հայաստանը այսպիսի որակյալ բաներ է արտադրում»,-ասաց նա։
Ամփոփելով իր խոսքը՝ նա նշեց, որ իրենք այս միջոցառումով մի քանի նպատակ էին հետապնդում՝ նախ ցանկանում էին, որ Հայաստանի և Իրանի միջև առևտուրն ակտիվանա, որ հայկական ապրանքներն այս դժվար շուկան մտնեն: Կարևոր նպատակներից է այն, որ համատեղ ծրագրեր ծնվեն:
«Իրենք ոգևորեն, գան, մերոնց որակը տեսնեն, գան միասին Հայաստանում արտադրեն՝ երրորդ երկիր դուրս գալու նպատակով, հայկական և իրանական կապիտալը կմիանա և դուրս կգա, օրինակ՝ եվրասիական կամ եվրոպական շուկա»,- ասաց նա: