Էրդողանը ՄԱԿ-ին և միջազգային հանրությանը մեղադրել է սիրիական ճգնաժամին անհաղորդ մնալու համար
Թուրքիայի նախագահ Ռեջեփ Թայիփ Էրդողանն ԱՄՆ մեկնելուց առաջ Ստամբուլի Աթաթուրքի անվան օդանավակայանում տեղի ունեցած մամուլի ասուլիսի ժամանակ մեղադրել է ՄԱԿ-ին և միջազգային հանրությանը սիրիական ճգնաժամին անհաղորդ մնալու համար, գրում է թուրքական Anadolu գործակալությունը;
«Սիրիական ճգնաժամը միայն Սիրիայի ու նրա մի քանի հարևանի խնդիրը չէ: Այս ճգնաժամի հետևանքները տարածվելու են նաև մյուս տարածաշրջանների վրա: Սիրիայի ճգնաժամը լուծելու ճանապարհին կորցրած ամեն վայրկյանը ՄԱԿ-ի ամոթն է: Մարդկությունը պետք է սկսի գիտակցել այս հարցում իրենց ունեցած պատասխանատվությունը, և ամենաշատը` զարգացած երկրները», - ասել է Էրդողանը:
Հիշեցնենք, որ թուրքական հատուկ նշանակության ուժերն օգոստոսի 24-ի առավոտյան մտել են Սիրիայի տարածք՝ «Իսլամական պետություն» խմբավորման գրոհայիններից հյուսիսային Ջերաբլուս քաղաքի ազատագրման գործողության շրջանակում: Թուրքական ԶՈւ-ին աջակցում են նաև «Սիրիական ազատ բանակ» ընդդիմադիր խմբավորումն ու կոալիցիոն ուժերը՝ օդային հարվածների միջոցով:
Սեպտեմբերի 16-ին ԱՄՆ-ից հատուկջոկատայիններ են ժամանել սիրիական Ռաի շրջան` ԻՊ-ի երկրորդ «մայրաքաղաք» համարվող Էլ Բաբը թուրքական ԶՈՒ-ի հետ ազատագրելու նպատակով: