Հուրի Գեբեշյանը ցանկանում է Հայաստանի ուրույն տեղն ամրագրել մարմնամարզության քարտեզի վրա. WSJ-ի անդրադարձը հայ մարզուհու ելույթին
Ամերիկյան հեղինակավոր The Wall Street Journal պարբերականն ուշագրավ անդրադարձ է կատարել Ռիո դե Ժանեյրոյում ընթացող Օլիմպիական խաղերում Հայաստանի ազգային հավաքականը ներկայացնող մարմնամարզուհի Հուրի Գեբեշյանի ելույթին:
Անդրադարձի հեղինակ Լուիզ Ռադնոֆսկին նկատում է, որ հայ գաղթականների ընտանիքում ծնված Գեբեշյանը, անկասկած, հայկական սփյուռքի հպարտությունն է, ում անունով կիրակնօրյա հոյակապ ելույթից հետո կկոչվի պտտաձողերի վրա կատարված նոր հնարքը:
Հեղինակն ընթերցողների ուշադրությունը հրավիրում է այն փաստին, որ ելույթից հետո Գեբեշյանը համբուրել է մարզական գործիքները:
«Ես պարզապես ուզում էի այդ ձևով երախտագիտությունս հայտնել այս մարզաձևին»,-ասել է Գեբեշյանը՝ հավելելով, որ մրցումների ընթացքում իրեն անչափ օգնել ու աջակցել են բազում հայեր:
Ռադնոֆսկին հիշեցնում է, որ Գեբեշյանն առաջին կին մարմնամարզուհին է, ով Օլիմպիական խաղերում ներկայացնում է Հայաստանն ու աշխարհին ի ցույց դնում հայկական դրոշը:
«Իրականում իմ նպատակն է մարմնամարզության քարտեզի վրա ամրագրել Հայաստանի ուրույն տեղը»,-մեջբերում է հեղինակը Գեբեշյանի խոսքերը:
Այնուհետև հեղինակը հպանցիկ անդրադարձ է կատարում հայուհու ընտանիքին՝ նշելով, որ նրա տատերն ու պապերը Ցեղասպանության պատճառով փախել են Լիբանան, որտեղ էլ լույս աշխարհ են եկել մարմնամարզուհու ծնողները: