Պուտինը և Լավրովը Հայաստանի և Ադրբեջանի համար ունեն կոնկրետ առաջարկներ. Ալեքսեյ Մուխին
Ընդհանրապես խոսք չի գնում Հայաստանի կողմից Ադրբեջանին տարածքների զիջման մասին. Tert.am-ի հետ զրույցում խոսելով Ռուսաստանի Դաշնության նախագահ Վլադիմիր Պուտինի և Ադրբեջանի նախագահ Իլհամ Ալիևի հանդիպմանը «լավրովյան ծրագրի» հնարավոր քննարկման մասին՝ ասաց Ռուսաստանի Դաշնության Քաղաքական տեղեկատվության կենտրոնի գլխավոր տնօրեն Ալեքսեյ Մուխինը:
Նա հերքեց, որ «լավրովյան ծրագիրն» իրենից ենթադրում է տարածքների զիջում:
«Խոսք է գնալու Ադրբեջանի և Հայաստանի հարաբերությունները բալանսավորելու մասին։ Միակողմանի որևէ փոխզիջման մասին խոսք չի գնում»,- հայտարարեց Ալեքսեյ Մուխինը:
Նշենք, որ օգոստոսի 8-ին ՌԴ նախագահ Վլադիմիր Պուտինը պաշտոնական այցով լինելու է Ադրբեջանում: Այստեղ առաջին անգամ տեղի է ունենալու Ռուսաստանի, Ադրբեջանի և Իրանի նախագահների եռակողմը հանդիպումը. նախատեսվում է նաև առանձին երկկողմ հանդիպում Ռուսաստանի և Ադրբեջանի նախագահների միջև: Նշենք, որ ՀՀ Նախագահ Սերժ Սարգսյանը օգոստոսի 10-ին պաշտոնական այցով մեկնելու է ՌԴ։
Հարցին, թե այս երկու հանդիպումների միջև կապ տեսնո՞ւմ է, Ալեքսեյ Մուխինը պատասխանեց. «Այո, այդ հանդիպումների միջև կա ուղղակի կապ: Վլադիմիր Պուտինը կարծես թե ցանկանում է ստեղծել մեխանիզմ, որով կկանխվեն այնպիսի իրավիճակները, որոնք եղան վերջին շրջանում և որոնց լուծման համար բավականին երկար ժամանակ պահանջվեց: Խոսքս Լեռնային Ղարաբաղում վերջին շրջանի հրետանային ռմբակոծությունների մասին է»։
Ըստ Ալեքսեյ Մուխինի՝ Վլադիմիր Պուտինը և Սերգեյ Լավրովը Հայաստանի և Ադրբեջանի համար ունեն կոնկրետ առաջարկներ, որոնցով կկանխեն զինված միջադեպերը:
«Եթե հաջողվի ձեռք բերել կոնսենսուս և՛ Հայաստանի, և՛ Ադրբեջանի կողմից, ապա այդ մեխանիզմը կաշխատի»,-ասաց նա:
Հարցին՝ արդյո՞ք կաշխատի Ռուսաստանի կողմից առաջարկվող վերը նշված մեխանիզմը, կընդունե՞ն դա կողմերը, Ալեքսեյ Մուխինը պատասխանեց. «Պետք է սպասել. և՛ հայկական, և՛ ադրբեջանական կողմը դժվար բանակցողներ են: Այդ մեխանիզմի արդյունավետությունը կարող ենք գնահատել միայն ժամանակ, երբ կողմերը սկսեն աշխատել»: